विराटनगर । आदर्श माध्यामिक विद्यालय विराटनगरका प्रधानाध्यापक तुलसीप्रसाद दुलालको बिदाइ गरिएको छ । सोमबार बिदाइ समारोह आयोजना गरी प्र.अ.दुलालको बिदाइ गरिएको हो ।
विराटनगर महानगरपालिकाका प्रमुख भीम पराजुली र विद्यालय व्यवस्थापन समितिका पदाधिकारीहरु तथा विद्यार्थीहरुले प्र.अ. दुलालको बिदाइ गरेका थिए । शिक्षण पेशाबाट अवकाश प्राप्त गर्नुभएका दुलाललाई खादा र दोसल्ला आढाएर अबिरजात्रासहित मायाको चिनो दिइएको थियो ।
बिदाइ मन्तव्य राख्दै दुलालले सबै विद्यालय परिवारको सहयोगबाट आफ्नो कार्यकाल सफलतापूर्वक बिताएको अनुभव व्यक्त गरे । उनले आगामी दिनमा पनि शैक्षिक क्षेत्रको विकासमै क्रियाशील रहने प्रतिवद्धता व्यक्त गरे ।
महानगरका प्रमुख तथा विद्यालय व्यवस्थापन समितिका अध्यक्ष पराजुलीले निवर्तमान प्रधानाध्यापक दुलालको शैक्षिक जीवन नयाँ पुस्ताका युवाका लागी प्रेरणाको श्रोत भएको बताए । उनले दुलालको कार्यकालको प्रशंसासमेत गरे । महानगरमा नमूना विद्यालयको अवधारणाका लागि दुलालको ठूलो सहयोग रहेको भन्दै उनको कुशल व्यवस्थापक रहेको बताए ।
बिदाइका लागि कार्यक्रममा आदर्श माविका सह–प्रधानाध्यापक सन्तोष पोखरेलको संयोजकत्वमा समिति गठन गरेको थियो ।
