विराटनगर । साफ च्याम्पिनसिपको अन्तिम तयारीमा कतारमा रहेको नेपाली राष्ट्रिय फुटबल टोलीले ओमानको राष्ट्रिय टोलीबीच अर्को साता मैत्रीपूर्ण खेल हुने भएको छ ।
अखिल नेपाल फुटबल संघ एन्फाका अनुसार नेपाल र ओमानबीचको खेल आइतबार दोहास्थित कतार विश्वविद्यालयको मैदानमा स्थानिय समय अनुसार साँझ ७ बजे खेल सुरु हुनेछ । भारतसँग भदौ १७ र २० गते दुई मैत्रीपूर्ण खेल खेलेपछि नेपाली टोली कतार पुगेको थियो ।
कतारमा दुई साता अभ्यासपछि नेपाली टोली असोज ११ गते त्यहिँबाट साफ च्याम्पिनसिप आयोजनास्थत माल्दिभ्स जानेछ । माल्दिभ्समा असोज १५ गतेबाट साफ च्याम्पियनसिप सुरु हुँदैछ । नेपालले पहिलो दिननै साविक विजेता समेत रहेको माल्दिभ्सको सामना गर्नेछ ।
राष्ट्रिय टोलीले शनिबार दोहामा स्थानीय अल बिदा स्पोर्टस क्लबसँग मैत्रीपूर्ण खेल खेलेको थियो । अधिकांश खेलाडीलाई मौका दिइएको खेलमा अन्जन विष्ट र अनन्त तामाङले गोल गर्दा नेपाली टोली २–० ले विजयी भएको थियो ।
कतार जानुअघि नेपाली टोलीले भारतसँग दुई मैत्रीपूर्ण खेल खेलेको थियो । दशरथ रंगशालामा नेपाल र भारतबीच भदौ १७ गते भएको मैत्रीपूर्ण खेल १–१ को बराबरीमा टुंगिएको थियो भने दोस्रो खेलमा नेपाल २–१ ले पराजित भएको थियो ।
यसपटक साफ च्याम्पियनसिपमा नेपाल र भारतबीच असोज २४ गते खेल हुनेछ । नेपाल, भारत, माल्दिभ्स, श्रीलंका र बंगलादेशको सहभागिता रहेको यसपटकको च्याम्पियनसिप राउन्ड रोविनका आधारमा हुनेछ । शीर्ष २ टोलीले असोज ३० गते फाइनल खेल्नेछन् ।
