इटहरा । कादुपाडा युवा क्लबको आयोजनामा संचालित वडा स्तरीय फुटबल प्रतियोगिताको उपाधि वडा नम्बर ९ ले हात पारेको छ ।
स्थानीय सरस्वती माध्यमिक विद्यालयको खेल मैदानमा शनिबार सम्पन्न फाइनल खेलमा वडा नम्बर ६ लाई १(० गोल अन्तरले पराजित गर्दै ९ नम्बर विजेता बनेको हो ।
दोस्रो हाफ सुरु भएको केही मिनेटमै मंगल हेमरमले गरेको गोल नै ९ नम्बरको जितका लागि निर्णायक गोल बन्यो । उपाधिसँगै ९ नम्बरले नगद २० हजार रुपैयाँ पुरस्कार प्राप्त गरेको छ ।
यस्तै उपविजेता ६ नम्बरले नगद १० हजार पुरस्कार प्राप्त गरेको छ । मोरङ क्षेत्र नम्बर २ (क) का प्रदेशसभा सदस्य शिवकुमार गनगाई, वडा नम्बर ६ का वडा अध्यक्ष तुलाराम लुइँटेल, समाजसेवी कृष्ण कार्कीका बुबा चन्द्रबहादुर कार्की, काजी खड्का, उमेश भट्टराई लगायतले खेलाडीहरुलाई ट्रफी, मेडल र प्रमाणपत्र प्रदान गर्नुभयो ।
फाइनल खेलको म्यान अफ दि म्याच वडा नम्बर ६ का उपेन्द्र कार्की घोषित भए । प्रतियोगितामा वडा नम्बर ९ का मंगल हेमरम म्यान अफ दि सिरिज, राजकुमार खड्का उत्कृष्ट डिफेन्स, अरुण खड्का उत्कृष्ट मिड फिल्डर, चन्दन खवास उत्कृष्ट स्ट्राइकर घोषित भए । यस्तै वडा नम्बर ६ का अभिषेक दङ्गाल उत्कृष्ट गोलरक्षक र कुनसाङ तामाङ सर्वाधिक गोलकर्ता बने । उनीहरूलाई ट्रफीसहित मेडल र प्रमाणपत्र प्रदान गरिएको कार्यक्रम संचालक दिनेशकुमार बिष्टले जानकारी दिनुभयो । गत फाल्गुन १३ गतेदेखि संचालित उक्त प्रतियोगितामा १० टिमको सहभागिता रहेको थियो ।
