विराटनगर । कोशी प्रदेश सरकार मन्त्रिपरिषद्को बैठक आज जेठ १४ गते सम्पन्न भएको छ। बैठकले प्रदेशको विकास, पूर्वाधार तथा विभिन्न विकास समितिहरूको व्यवस्थापनका लागि केही महत्त्वपूर्ण निर्णयहरू गरेको छ।
मन्त्रिपरिषद् बैठकले आयोजना बैंक सूचना प्रणालीमा प्रविष्ट भएका विभिन्न आयोजनाहरूको सूचीकृत विवरण प्रभावकारी रूपमा कार्यान्वयन अगाडि बढाउनका लागि प्रदेश योजना आयोगलाई सहमति प्रदान गर्ने निर्णय गरेको छ। यसैगरी सिँचाइ व्यवस्थापन हस्तान्तरण कार्यविधिलाई थप व्यवस्थित बनाउनका लागि ‘सिँचाइ कार्यविधि २०८३’ लाई आवश्यक छलफल र परिमार्जनका लागि आर्थिक, सामाजिक तथा पूर्वाधार समितिमा पठाउने निर्णय भएको छ।
नागरिकहरूको सहजतालाई ध्यानमा राख्दै आवश्यक कानुनी प्रक्रिया पूरा गरी पुरानो घरको पुराना काठहरू ओसारपसार गर्न पाउने गरी खुला गर्ने निर्णय पनि मन्त्रिपरिषद्ले गरेको छ।
यसैगरी बैठकले प्रदेशका दुई महत्त्वपूर्ण धार्मिक तथा पर्यटकीय क्षेत्र विकास समितिहरूमा कार्यकारी निर्देशक नियुक्त गरेको छ। हलेसी महादेव स्थान विकास समितिको कार्यकारी निर्देशक पदमा खोटाङको हलेसी तुवाचुङ नगरपालिका वडा नं. ७ निवासी चक्रबहादुर राईलाई नियुक्त गरिएको छ भने बृहत्तर वराहक्षेत्र विकास समितिको कार्यकारी निर्देशक पदमा सुनसरीको वराहक्षेत्र नगरपालिका वडा नं. १ निवासी अविजाल विष्टलाई नियुक्ति दिने निर्णय भएको छ।
प्रतिक्रिया दिनुहोस्
यस लेखमा प्रतिक्रिया बन्द गरिएको छ।