विराटनगर । लागूऔषध कारोबारीविरुद्ध आक्रामक बनेको प्रहरीले मोरङको विराटनगरबाट ठुलो परिमाणमा खैरो हेरोइनसहित दुई जनालाई पक्राउ गरेको छ। सोमबार विराटनगर महानगरपालिका–९ स्थित पतञ्जली रोडबाट १ सय ९१ ग्राम अवैध लागूऔषध खैरो हेरोइनसहित दुई जना पक्राउ परेका हुन्।
पक्राउ पर्नेहरूमा विराटनगर–१७ का २५ वर्षीय बाबु मियाँ र भारत बिहार, अररियाका ३० वर्षीय रोनी भन्ने मोहमद अब्दुल्ला रहेका छन्। लागूऔषध नियन्त्रण ब्यूरो कोटेश्वरबाट खटिएको विशेष टोलीले उनीहरूलाई उक्त प्रतिबन्धित पदार्थसहित नियन्त्रणमा लिएको हो। बरामद गरिएको हेरोइनको परिमाण र भारतीय नागरिकको संलग्नताले सीमावर्ती क्षेत्रमा हुने अवैध कारोबारको जालो तोड्न प्रहरीलाई थप मद्दत पुग्ने देखिएको छ।
विराटनगरमा मात्र नभई प्रहरीले सोमबार देशका अन्य जिल्लाहरूमा पनि लागूऔषधविरुद्ध ठुलो सफलता हात पारेको छ। सुर्खेतको वीरेन्द्रनगर–८ कालिन्चोकबाट ६ सय ६६ ग्राम चरेससहित जाजरकोटका १९ वर्षीय भगीराम जैसी पक्राउ परेका छन्। कर्णाली प्रदेश प्रहरी कार्यालय र जिल्ला प्रहरीको संयुक्त टोलीले उनलाई नियन्त्रणमा लिएको हो।
यस्तै, सिन्धुलीको कमलामाई नगरपालिका–६ रातमाटाबाट ९ सय ८० मिलिग्राम ब्राउन सुगर र ८ हजार ३ सय ६५ रुपैयाँ नगदसहित ३९ वर्षीय शंकर खड्का र ३८ वर्षीय चन्द्र बहादुर थापा पक्राउ परेका छन्। उता मकवानपुरको हेटौंडा–१० मा पनि लागूऔषधविरुद्ध प्रहरीको सक्रियता देखिएको छ। बा.प्र.०६–००७ प ९८३६ नम्बरको मोटरसाइकलमा सवार २८ वर्षीय रूफस लामालाई डाइजेपाम, फेनारगन र नोर्फिन जस्ता नियन्त्रित औषधिहरू सहित प्रहरीले पक्राउ गरेको छ।
पक्राउ परेका सबै व्यक्तिहरूमाथि सम्बन्धित जिल्लाका प्रहरी कार्यालयहरूले लागूऔषध नियन्त्रण ऐनअनुसार आवश्यक अनुसन्धान र कानुनी प्रक्रिया अगाडि बढाएको जानकारी दिएका छन्।
प्रतिक्रिया दिनुहोस्
यस लेखमा प्रतिक्रिया बन्द गरिएको छ।