विराटनगर । जनकपुरबाट धरानको भेडेटारमा शैक्षिक भ्रमणका लागि आएको एक निजी विद्यालयको बस दुर्घटना हुँदा ४ जनाको मृत्यु भएको छ भने १७ जना घाइते भएका छन् ।
आइतबार दिउँसो करिब ४ बजेर १० मिनेट जाँदा धरानको जिरो प्वाइन्टमा जनकपुरस्थित इन्टरनेशनल टेम्स एकेडेमीको को १ ख ७११९ नम्बरको बस दुर्घटनामा परेको हो । सुनसरीका प्रहरी प्रवक्ता प्रहरी नायव उपरीक्षक (डिएसपी) चन्द्र खड्काका अनुसार भेडेटार घुमेर फर्कने क्रममा बस अनियन्त्रित भई दुर्घटना भएको हो ।
खड्काका अनुसार उक्त बसमा विद्यार्थी नभई विद्यालयका शिक्षक तथा कर्मचारीहरू सवार थिए । जिरो प्वाइन्टमा एउटा स्कुटरलाई बचाउने क्रममा वा अनियन्त्रित भई बस सडक छेउको एक मेडिकल पसलमा ठोकिएको र त्यसपछि सडकमा पल्टिएको प्रारम्भिक अनुसन्धानबाट देखिएको छ । दुर्घटनामा स्कुटरमा पनि क्षति पुगेको छ ।
दुर्घटनामा ४ जनाको मृत्यु भएको खड्काले पुष्टि गरे । यस्तै, घाइते १७ जनालाई उपचारका लागि धरानस्थित बीपी कोइराला स्वास्थ्य विज्ञान प्रतिष्ठान घोपा पुर्याइएको छ । घाइतेमध्ये धरान–१३ की यशोदा श्रेष्ठको पहिचान खुलेको छ भने अन्यको विवरण संकलन भइरहेको छ ।
प्रहरी प्रवक्ता खड्काका अनुसार बस चालकको अवस्था र पहिचानबारे हाल अस्पतालमा बुझ्ने कार्य भइरहेको छ । घटनास्थलमा प्रहरीले उद्धार कार्य जारी राखेको छ ।
फाइल तस्बिर
प्रतिक्रिया दिनुहोस्
यस लेखमा प्रतिक्रिया बन्द गरिएको छ।