विराटनगर । काभा महिला भलिबल नेसन्स लिगमा श्रीलंकालाई हराउँदै नेपालले विजयी सुरूवात गरेको छ । घरेलु टोली नेपालले श्रीलंकालाई सोझो सेटमा हराउँदै विजयी सुरूवात गरेको हो ।
राष्ट्रिय खेलकुद परिषदको कभर्ड हलमा भएको खेलमा नेपालले श्रीलंकालाई २५–१९, २५–१८ र २५–१९ को सहज नतिजामा हराएको छ । सुरूवात राम्रो गरेको नेपालले पहिलो सेटमा ६–२ को अग्रता बनाइसकेको थियो ।
यसपछि निरन्तर अंक जोडेर नेपालले पहिलो सेटमा श्रीलंकालाई २५–१९ ले आफ्नो पक्षमा पारेको छ । हाइट एडभान्टेज रहेको श्रीलंका दोस्रो सेटमा पनि खेलमा फर्कन सकेन । दोस्रो सेटमा पनि कुनै पनि समय श्रीलंकाले अग्रता बनाउन सकेन भने नेपालले २५–१८ ले दोस्रो सेट जित्दै नेपालले दुई शुन्यको अग्रता बनायो ।
दुई शुन्यले पछि परेको श्रीलंकाले तेस्रो सेटको सुरूवातमा नेपाललाई दबाब दिएको छ । । श्रीलंकाले ७–३ ले अग्रता बनायो । नेपाल खेलमा फर्कने कोशिशमा थियो र खेल १५–१५ को बराबरीमा पुग्यो ।
प्रतियोगितामा नेपाल सहित भारत, श्रीलंका, माल्दिभ्स र इरानको सहभागिता रहेको छ । प्रतियोगिता अन्तर्गत भोली दुई खेल हुनेछन् । पहिलो खेलमा इरान र श्रीलंकाबीच प्रतिस्पर्धा हुनेछ। दोस्रो खेलमा माल्दिभ्सले भारतको सामना गर्नेछ ।
