विराटनगर । दुई जनामा कोरोना संक्रमण पुष्टि भएपछि विराटनगर महानगरपालिकाले दुई वटा वार्ड पूर्णरुपमा सिलबन्दी गर्ने निर्णय गरेको छ ।
कोरोना भाइरस संक्रमण फैलिन नदिन विराटनगर १५ र विराटनगर ६ लाई सिलबन्दी गरेर संक्रमितसँग सम्पर्कमा पुगेका व्यक्तिहरुको पहिचान गर्ने र उनीहरुको परीक्षण गर्ने तयारी गरिएको हो ।
विराटनगर १५ हडतालीहाट क्षेत्रका एक ३५ वर्षे युवा र विराटनगर ६ का २९ वर्षे महिलामा कोरोना पुष्टि भएको छ । पुरुष विराटनगर महानगरपालिकाका सफाई कर्मचारी हुन् भने महिला माछा व्यापारी हुन् । ती महिला केही दिन अगाडि मात्रै भारतबाट नेपाल फर्केको बताइएको छ ।
विराटनगरका दुई वटा वडा सिलबन्दी गर्ने र अत्यावश्यक सेवा अन्तरगत दूध, पानी, औषधि पसल व्यवसाय बाहेक सबै बन्द गर्ने निर्णय भएको जिल्ला प्रहरी कार्यालय मोरङका एसपी विश्व अधिकारीले फेसबुक पेजमा लेखेर सार्वजनिक जानकारी दिनुभएको छ ।
