विर्तामोड । झापाको बिर्तामोडमा ‘अटो रिक्सामा’ गीतको म्युजिक भिडियो सार्वजनिक गरिएको छ ।
पत्रकार तथा मोडल रमेश तिवारी र मोडल वन्दना आचार्य (बेबो) द्वारा अभिनित हलेसी टेड्र लिंकका प्रबन्धक चूडामणि पौडेलको ‘अटो रिक्सामा’ म्युजिक भिडियो सार्वजनिक गरिएको हो ।
अग्रज पत्रकार चन्द्र भण्डारीले म्युजिक भिडियो औपचारिक रूपमा सार्वजनिक गर्नुभएको थियो । विर्तामोडका युवा व्यवसायी पौडेलले दर्जन बढी गीतको रचना गरिसक्नुभएको छ ।
गायक सन्तोष शिवाको स्वरमा रहेको म्युजिक भिडियोमा टिका भण्डारीको संगीत रहेको छ । निर्माता पौडेलको रचनामा तयार पारिएको म्युजिक भिडियोको निर्देशन शंकर कोइरालाले गर्नुभएको हो । भिडियोलाई झापा, काठमाडौँ र चितवनका विभिन्न भूगोलमा छायांकन गरिएको बताइएको छ ।
भिडियोमा मोडल तिवारीलाई अटो ड्राइभरको रूपमा देख्न सकिन्छ । विदेशिएर दुःख गर्नुभन्दा नेपालमै बसेर पनि केही गर्न सकिन्छ भन्ने सन्देश म्युजिक भिडियोमार्फत दिइएको छ । भिडियोमा रमेश र वन्दनाको प्रेमलाई झल्काइएको छ ।
