विराटनगर । आज असार १ गतेदेखि लागू हुने कानुनी व्यवस्थाअनुसार देशभरका वन क्षेत्रमा रुख कटान, मुछान, काठ तथा वन पैदावार संकलन, नदी तथा खोलाबाट ढुंगा, गिट्टी, बालुवा लगायत नदीजन्य पदार्थको उत्खनन र संकलनमा रोक लाग्ने भएको छ।
वनसम्बन्धी प्रचलित कानुनी व्यवस्थाअनुसार मनसुन सुरु हुने असार १ गतेदेखि भदौ मसान्तसम्म वन क्षेत्रभित्र यस्ता गतिविधिमा मौसमी प्रतिबन्ध लगाइने व्यवस्था छ। यसको उद्देश्य वर्षायाममा वन तथा जैविक विविधताको संरक्षण गर्नु, प्राकृतिक पुनरुत्पादनलाई प्रोत्साहन गर्नु, भूक्षय तथा पहिरोको जोखिम कम गर्नु र वनजन्य स्रोतको दिगो व्यवस्थापन गर्नु हो।
यस अवधिमा स्वीकृत कार्ययोजना भएका वनमा समेत सामान्यतया रुख कटान, मुछान र काठ संकलनका काम स्थगित गरिन्छ। यस्तै वन क्षेत्रभित्र वा वनसँग सम्बन्धित नदी तथा खोलामा ढुंगा, गिट्टी, बालुवा लगायत नदीजन्य पदार्थको उत्खनन तथा संकलनमा पनि रोक लाग्छ।
वन कार्यालयहरूले मनसुन अवधिमा अनधिकृत कटानी, चोरी निकासी तथा अवैध उत्खनन हुन नदिन निगरानी र अनुगमनलाई थप प्रभावकारी बनाउने गरेका छन्। सामुदायिक वन उपभोक्ता समूह, वन उपभोक्ता समिति तथा स्थानीय तहलाई पनि कानुनी व्यवस्थाको पालना गराउन आग्रह गरिएको छ।
अधिकारीहरूका अनुसार प्रतिबन्धको उल्लङ्घन गरी वन पैदावार कटानी, संकलन वा नदीजन्य पदार्थको अवैध उत्खनन तथा ओसारपसार गरेमा प्रचलित वनसम्बन्धी कानुनअनुसार जफत, जरिवाना तथा कसुरको प्रकृतिअनुसार अन्य कानुनी कारबाही हुन सक्छ।
वन संरक्षणकर्मीहरूले वर्षायामलाई वनको प्राकृतिक पुनर्जननको महत्वपूर्ण समय मानिने भएकाले यस अवधिमा हुने मानवीय हस्तक्षेप न्यून गर्न कानुनी रूपमा विशेष व्यवस्था गरिएको बताएका छन्। उनीहरूका अनुसार असारदेखि लागू हुने यो प्रतिबन्धले वन संरक्षण, जलाधार व्यवस्थापन र वातावरणीय सन्तुलन कायम गर्न महत्वपूर्ण भूमिका खेल्ने अपेक्षा गरिएको छ।
प्रतिक्रिया दिनुहोस्
यस लेखमा प्रतिक्रिया बन्द गरिएको छ।