विराटनगर– विराटनगरबाट चोरी भएका सिटी सफारीहरू कवाडी गोदाममा पुर्याएर पार्टपूर्जा गरी बिक्री गर्ने गरिएको खुलासा भएको छ । विराटनगर–६ सरैचियास्थित विजय सहनीको कवाडी गोदाममा चोरीका सफारी फेला परेपछि यस्तो तथ्य बाहिर आएको हो ।
मोरङ प्रहरीलाई प्राप्त विशेष सूचनाका आधारमा बिहीबार दिउँसो उक्त गोदाममा छापा मारिएको थियो । प्रहरीले खानतलासी गर्दा गोदामभित्र प्लाष्टिकजन्य कवाडी सामानले छोपेर लुकाइराखेको अवस्थामा दुई थान सिटी सफारीका पार्टपूर्जाहरू फेला पारेको छ ।
मोरङ प्रहरीका प्रवक्ता एवं डिएसपी लिलाराज लामिछानेका अनुसार चोरीका सफारी खरिद गरेर त्यसका पार्टपूर्जा अलग्याई लुकाएर राखिएको अवस्थामा बरामद गरिएको हो । “विराटनगर र आसपासका क्षेत्रबाट चोरी भएका सिटी सफारीहरू यो गोदाममा खरिद गर्ने गरिएको प्रारम्भिक अनुसन्धानबाट देखिएको छ,” डिएसपी लामिछानेले भने, “अहिले हामी अनुसन्धानकै क्रममा छौं, थप विवरण खुल्न बाँकी छ ।”
गोदाम सञ्चालक सहनीले कति रकममा चोरीका सफारी खरिद गर्थे भन्नेबारे प्रहरीले खोजी गरिरहेको छ । प्रहरी टोली पुगेको सुइँको पाएलगत्तै सञ्चालक सहनी फरार भएका छन् । विराटनगरसहित मोरङका विभिन्न स्थानमा पछिल्लो समय सिटी सफारी चोरी हुने क्रम बढेपछि प्रहरीले निगरानी तीव्र पारेको थियो । फरार सहनीको खोजी भइरहेको र बरामद गरिएका सामानबारे थप अनुसन्धान भइरहेको प्रहरीले जनाएको छ ।
प्रतिक्रिया दिनुहोस्
यस लेखमा प्रतिक्रिया बन्द गरिएको छ।