सुनसरी । अन्तर्राष्ट्रिय आमन्त्रण बुढासुब्बा गोल्ड कप प्रतियोगिताको २३ औँ संस्करण आगामी २६ चैतबाट हुने भएको छ । धरान फुटबल क्लबले बुधवार पत्रकार सम्मेलन गर्दै प्रतियोगिता २६ चैतदेखि ३ वैशाखसम्म आयोजना गर्ने जानकारी दिएको हो । धरान–१६ स्थित रङ्गशालामा हुने प्रतियोगितामा भारतको दुई क्लबसहित आठ टिम सहभागी हुने क्लबका अध्यक्ष किशोर राईले जानकारी दिए ।
प्रतियोगितामा सम्भावित सहभागी टिमहरूमा हालै सम्पन्न भएको सहिद स्मारक लिगको उत्कृष्ट तीनवटा टिम रहेको पनि आयोजकले जनाएको छ । यस्तै, भारतका दुईवटा क्लब र मोफसलको अन्य दुई उत्कृष्ट क्लब पनि प्रतियोगितामा सहभागी हुने आयोजकको भनाइ छ ।
प्रतियोगिताको विजेताले ट्रफीसँगै नगद १० लाख र उपविजेताले नगद पाँच लाख पाउनेछ । यस्तै, प्रतियोगिताको उत्कृष्ट खेलाडीले एक लाख ५० हजार पाउने छन् । त्यस्तै आयोजकले प्रत्येक खेलको म्यान अफ दि म्याचले १० हजार नगद पुरस्कार दिने व्यवस्था गरेको छ । प्रतियोगिताको सर्वाधिक गोलकर्ताले नगद २० हजार पाउनेछन् भने उत्कृष्ट डिफेन्स, उत्कृष्ट गोलकिपर, उत्कृष्ट मिडफिल्डर, उत्कृष्ट स्ट्राइकर र उत्कृष्ट प्रशिक्षकले जनही नगद १५ हजार पुरस्कार पाउनेछन् ।
सहभागी टिमहरूको निर्क्योल भएपछि पुनः पत्रकार सम्मेलन गरेर जानकारी दिने पनि अध्यक्ष राईले बताए ।
