कानेपोखरी । मोरङ कानेपोखरी गाउँपालिकामा रहेको ग्रामीण सुधार सामुदायिक वन उपभोक्ता समुहले आयोजना गरेको वृक्षारोपण कार्यक्रमको आज भव्यता साथ उद्घाटन गरिएको छ । सो कार्यक्रमको उद्घाटन पालिका अध्यक्ष ताराबहादुर काफ्लेले बिरुवा रोपेर गरेका हुन्।
कानेपोखरी–६ सुन्तोलीदेखि पूर्व रहेको सोही वनको क्षेत्र नं. ३ भित्र पर्ने ७ हेक्टर जमिनमा ११ हजार २ सयवटा बिरुवाहरू रोप्न सुरू गरिएको छ। सव–डिभिजन वन कार्यालय कानेपोखरी, सोही पालिका भित्रका अन्य वन र सव–डिभिजन वन कार्यालय मङ्लबारेले सो बिरूवाहरू उपलब्ध गराएको हो ।
त्यस ठाउँमा साल, मसला, खयर, अम्बा, जामुन, सत्तिसाल, सिरिस टिकलगायतका जातको बिरुवाहरू रोपण गरिएको ग्रामीण सुधार सामुदायिक वनका अध्यक्ष नवीन राईले बताए ।
औपचारिक समारोहपछि सुरू गरिएको वृक्षारोपण कार्यक्रमको मुल नारा ‘सामुदायिक वन सबैका लागि सँधैका लागि’ भन्ने रहेको थियो । औपचारिक कार्यक्रमलाई सम्बोधन गर्दै पालिका अध्यक्ष काफ्ले भने, ‘बिरुवा रोप्नुभन्दा हुर्काउन गाह्रो हुन्छ, त्यसैले बोटबिरुवाको संरक्षण मेहेनतपूर्वक गर्नु आवश्यक छ ।’ उनले गाउँपालिकाभित्रका सामुदायिक वनलाई पालिकाले हरसमय सक्दो सहयोग गर्ने पनि बताए ।
सो वनका अध्यक्ष नवीन राईले एक रूख मास्दा त्यसको विकल्पमा अन्य केही बिरुवाहरू रोप्नु आवश्यक रहेको सुनाए । उनले समुदायस्तरमा कसैलाई निजी वन बनाउनका लागि बिरुवा चाहिएमा ग्रामीण सुधार वनमा सम्पर्क गर्न अनुरोधसमेत गरे ।
कार्यक्रममा प्रदेश १ सामुदायिक वन उपभोक्ता महासंघका अग्नि पौडेल, डिभिजन वन कार्यालय मोरङ प्रमुख अनिरुद्र शाह, सव डिभिजन वन कार्यालय, कानेपोखरी प्रमुख तुलसीलाल यादव, विभिन्न राजनीतिक दलका प्रतिनिधिहरू, स्थानीयलगायतको उपस्तिथि थियो।
