काठमाडौं । फिफा विश्वकप २०२६ को सेमिफाइनलमा इङ्ग्ल्यान्ड र अर्जेन्टिना फेरि आमनेसामने हुँदैछन्। यो केवल दुई फुटबल टोलीबीचको प्रतिस्पर्धा मात्र नभई चार दशकभन्दा लामो इतिहास, फकल्यान्ड युद्धको घाउ, डिएगो म्याराडोनाको चर्चित ‘ह्यान्ड अफ गड’ गोल, डेभिड बेकह्यामको उतारचढाव र दुवै देशबीचको गहिरो खेल–प्रतिद्वन्द्विताको अर्को अध्यायका रूपमा हेरिएको छ।
दक्षिण एटलान्टिक महासागरस्थित फकल्यान्ड टापुको स्वामित्वलाई लिएर सन् १९८२ मा बेलायत र अर्जेन्टिनाबीच ७४ दिनसम्म युद्ध भएको थियो। युद्धमा करिब ९ सय सैनिकको ज्यान गएको थियो भने बेलायतले टापुमाथि पुनः नियन्त्रण कायम गरेको थियो। युद्धमा बेलायती सेनाको पक्षबाट गोर्खा सैनिकले समेत महत्वपूर्ण भूमिका खेलेका थिए। युद्ध सकिए पनि त्यसले दुवै देशबीचको कटुता अन्त्य गर्न सकेन, बरु त्यो भावनाले पछि फुटबल मैदानमा नयाँ रूप लियो।
यसको सबैभन्दा चर्चित उदाहरण सन् १९८६ को विश्वकप क्वार्टरफाइनल हो। मेक्सिकोको एजुटेका रंगशालामा भएको खेलमा अर्जेन्टिनाका कप्तान डिएगो म्याराडोनाले हातले गरेको विवादास्पद ‘ह्यान्ड अफ गड’ गोल र त्यसको चार मिनेटपछि पाँच डिफेन्डरलाई छलाउँदै गरेको ‘गोल अफ द सेन्चुरी’ ले फुटबल इतिहास नै बदलिदियो। अर्जेन्टिनाले २–१ को जित निकाल्दा धेरै अर्जेन्टिनी समर्थकले त्यसलाई फकल्यान्ड युद्धको प्रतीकात्मक बदलाका रूपमा हेरे।
दुवै टोलीबीचको प्रतिस्पर्धा त्यसपछि पनि निरन्तर चर्किँदै गयो। सन् १९९८ को विश्वकपमा इङ्ग्ल्यान्डका डेभिड बेकह्याम रेड कार्ड पाएपछि टोली पेनाल्टी सुटआउटमा पराजित भयो र बेकह्याम आफ्नै देशमा आलोचनाको केन्द्र बने। तर २००२ को विश्वकपमा उनले अर्जेन्टिनाविरुद्ध निर्णायक पेनाल्टी गोल गर्दै इङ्ग्ल्यान्डलाई १–० को जित दिलाए र आफ्नो छवि पुनः स्थापित गरे।
यसपटकको विश्वकपमा पनि दुवै टोलीको यात्रा सहज रहेन। इङ्ग्ल्यान्डले कंगो डीआर, मेक्सिको र नर्वेविरुद्ध कठिन संघर्ष गर्दै अन्तिम चारमा स्थान बनायो भने अर्जेन्टिनाले केप भर्डे, इजिप्ट र स्विजरल्याण्डलाई पार गर्दै सेमिफाइनल यात्रा तय गर्यो। दुवै टोलीका प्रशिक्षकले सेमिफाइनलअघि अझ सुधार आवश्यक रहेको स्वीकार गरेका छन्।
सेमिफाइनलअघि अर्को रोचक विषय अर्जेन्टिनाको जर्सी पनि बनेको छ। फिफाले विशेष अनुमति दिएपछि अर्जेन्टिनाले इङ्ग्ल्यान्डविरुद्ध निलो (अवे) जर्सी लगाउने भएको छ। यही जर्सीमा अर्जेन्टिनाले सन् १९८६ र १९९८ को विश्वकपमा इङ्ग्ल्यान्डलाई पराजित गरेको थियो। इङ्ग्ल्यान्ड भने पूर्ण सेतो पोशाकमा मैदान उत्रिनेछ।
यसपटकको भेटमा मैदानमा न त म्याराडोना हुनेछन्, न डेभिड बेकह्याम। तर अर्जेन्टिनाका कप्तान लियोनेल मेस्सी र इङ्ग्ल्यान्डका कप्तान ह्यारी केनको नेतृत्वमा दुवै टोली इतिहासको अर्को अध्याय लेख्ने तयारीमा छन्। विशेष रूपमा, मेस्सीको लामो अन्तर्राष्ट्रिय करियरमा इङ्ग्ल्यान्डविरुद्धको यो पहिलो प्रतिस्पर्धा हुनेछ।
विश्व फुटबलका दुई शक्तिशाली राष्ट्रबीच हुने यो सेमिफाइनललाई केवल ९० मिनेटको खेलका रूपमा हेरिएको छैन। यसलाई इतिहास, राष्ट्रिय गौरव, फुटबल संस्कृति र चार दशकभन्दा लामो प्रतिद्वन्द्विताको निरन्तरताका रूपमा विश्वभरका समर्थकले चासोका साथ हेरेका छन्।
प्रतिक्रिया दिनुहोस्
यस लेखमा प्रतिक्रिया बन्द गरिएको छ।