मोरङको विराटनगरबाट प्रतिबन्धित लागुऔषध सहित ३ जना पक्राउ परेका छन् ।
पक्राउ पर्नेमा भारतको जोगबनी बस्ने २० बर्षीय तारिकवन अनवर, विराटनगर–६ का २० बर्षीय राज दास र सोही स्थानका २० बर्षीय मनिस दास रहेका छन् । उनीहरुलाई लागुऔषध नियन्त्रण ब्यूरो विराटनगरबाट खटिएको प्रहरी टोलीले पक्राउ गरेको हो ।
आईतबार साँझ साढे ६ बजे विराटनगर–१५ बाट पक्राउ परेका भारतीय नागरिक अनवरको साथबाट प्रहरीले ३५ ग्राम ५ सय ६० मिलिग्राम ब्राउन सुगर बरामद गरेको छ । साईकलको सिटमुनी ७ पोकामा ब्राउन सुगर लुकाई राखेको अवस्थामा प्रहरीले उनलाई पक्राउ गरेको हो ।त्यस्तै आईतबार साँझ करिब ५ बजेको समयमा विराटनगर–१५ स्थित विराटनगर–रानी सडकखण्डमा पैदल हिँडिरहेको बेला १२० नाईट्राभेट ट्याब्लेट सहित पक्राउ परेका राज र मनिसलाई पनि प्रहरीले नियन्त्रणमा लिएको छ ।
यसरी लागुऔषध सहित पक्राउ परेका तीनैजना उपर ईलाका प्रहरी कार्यालयले थप अनुसन्धान गरि कानुनी कारबाही अगाडि बढाएको छ ।
