विराटनगर । विराटनगरस्थित कोशी अस्पतालमा विरामीको कुरूवा बसेकी एक किशोरीलाई बलात्कारको प्रयास गरेको आरोपमा एक जना पक्राउ परेका छन् ।
प्रहरीले मोरङको कटहरी गाउँपालिका ७ का २८ वर्षीय सुरज मण्डललाई बुधबार किशोरीको जाहेरीका अधारमा पक्राउ गरेको हो ।
पक्राउ परेका मण्डलले कोशी अस्पतालको ‘फिमेल मेडिकल वार्ड’ मा बुधबार विहान ३ः३० बजे खोटाङ घर भएकी किशोरीलाई बलात्कारको प्रयास गरेको आरोप छ । किशोरीले मोरङ प्रहरीमा किटानी जाहेरी दिएपछि प्रहरीले अनुसन्धानको लागि मण्डललाई पक्राउ गरेको मोरङ प्रहरीका प्रवक्ता डिएसपी मानबहादुर राईले जानकारी दिनुभयो ।
डिएसपी राईले घटनाको अनुसन्धान भइरहेको जानकारी दिनुभयो । फिमेल मेडिकल वार्डमा सुतिरहेको अवस्थामा आफ्नो ओठमा मण्डलले चुम्बन गरेको र उनले प्रतिकार गरेपछि मण्डल फरार भएको जाहेरीमा उल्लेख छ ।
दिदीको छोरी विरामी भएपछि कोशी अस्पतालमा कुरुवा बसेकी किशोरीले आफूमाथि किस गर्दै बलात्कारको प्रयास भएको बताएकी छन् । किशोरीले प्रतिकार गर्दै होहल्ला गरेपछि अस्पतालबाट फरार भएका मण्डललाई अस्पतालका कर्मचारीले पहिचान गरेका थिए । पक्राउ परेका मण्डल अस्पतालमा दैनिकजसो आवतजावत गर्दै आएको बुझिएको छ । अस्पतालका जनसम्पर्क अधिकृत विष्णु बुढाथोकीले उनी अस्पतालको कर्मचारी नभएको बताउनुभयो ।
