पथरी । मोरङको पथरी शनिश्चरे नगर कार्यपालिकाको पछिल्लो बैठकले चालु आर्थिक वर्षकालागि चैत मसान्तसम्म सम्पूर्ण योजनाहरु सम्झौतागरिसक्नु पर्ने निर्णय गरेको छ ।
नगर तथा वडामा फागुन मसान्तसम्ममा सम्झौता गरिसक्ने अवधि तोकिएको भएपनि योजना सम्झौता नसकिएकाले नगर प्रमुख दिलीपकुमार राईको अध्यक्षतामा बसेको बैठकले एक महिना अवधि थप गरेको हो ।
ठकले पाँचौ नगरसभाबाट विपन्न आवासका लागि छुट्याएको ३० लाख रुपैयाँबाट जग्गा खरिद गर्ने निर्णय गरेको छ । त्यस योजनाको घरको जस्तापाताको छानोका लागि छुट्याएको २० लाखबाट ८ फुटे जस्तापाता खरिद गर्ने निर्णय भएको नगर प्रवक्ता यामप्रसाद गुरागाईंले बताउनुभयो ।
चैत मसान्तभित्र जग्गा खोजविन गर्न कार्यपालिका सदस्यहरुलाई जिम्मेवारीसमेत दिइएको छ । बैठकले, संघीय मामिला तथा सामान्य प्रशासन मन्त्रालयअन्तर्गतको तराई मधेश समृद्ध कार्यक्रम केन्द्रीय समन्वय इकाईमा सामूहिक आवास, सामुदायिक पूर्वाधार, साना सडक स्तरोन्नतीसहितका योजना माग गर्नेसमेत निर्णय गरेको छ ।
जसमा कृषिविकास, खानेपानी तथा सरसफाई, सिंचाई तथा नदी नियन्त्रण, उर्जा, विपद् न्यूनिकरण र पारम्पारिक पेशा प्रवद्र्धनात्मक एवम् आयआर्जन तथा जीवनस्तर सुधार कार्यक्रम पनि पेश गरिनेछ । नगरका सामुदायिक विद्यालयहरुको शैक्षिक गुणस्तर सुधार तथा बृद्धि कार्यक्रमका लागि प्रदेश १ को आर्थिक मामिला तथा योजना मन्त्रालय, सामाजिक विकास मन्त्रालयसहितका सरोकारवाला निकायसमक्ष माग पेश गर्ने पनि निर्णय गरेको छ ।
नगरको विपद् व्यवस्थापन उपसमितिमार्फत नगरका जोखिममा पर्नसक्ने वस्तीहरुको पहिचान गरी सम्वन्धित सरकारी निकायसमक्ष विपद् व्यवस्थापनका लागि माग गर्नेसहितको निर्णय गरिएको छ ।
