विराटनगर । नेपाली कांग्रेसका नेता कृष्णप्रसाद सिटौलाले राष्ट्रियसभा संसदीय दलको नेता परिवर्तन गर्ने पार्टीको निर्णयलाई ‘मूर्खताको पराकाष्ठा’ को संज्ञा दिएका छन् ।
विराटनगरमा मंगलबार आयोजित संस्थापन इतर पक्षको भेलामा सहभागी हुन आएका सिटौलाले सञ्चारकर्मीहरूसँग कुरा गर्दै यस्तो टिप्पणी गरेका हुन् ।
गत वैशाख १६ गते बसेको कांग्रेसको बैठकले सिटौलालाई राष्ट्रियसभा संसदीय दलको नेताबाट हटाएर उनको ठाउँमा सांसद कमला पन्तलाई नियुक्त गरेको थियो । आफ्नै पार्टीको उक्त कदमप्रति असन्तुष्टि पोख्दै सिटौलाले नेतृत्वको उक्त निर्णय विवेकपूर्ण नभएको बताए ।
सञ्चारकर्मीहरूसँगको कुराकानीमा उनले पार्टीलाई एकताबद्ध बनाएर लैजाने विषयमा गम्भीर छलफल भइरहेको समेत जानकारी दिए । ‘पार्टी एकढिक्का हुनुपर्छ भन्ने भावनाका साथ अहिले जिल्ला–जिल्लामा गएर छलफल र राय संकलन भइरहेको छ,’ उनले भने, ‘पार्टीको आगामी कार्यदिशा रोडम्याप तयार पार्न देशभरका कार्यकर्ताहरूको सुझाव लिने काम भइरहेको छ ।’
कांग्रेसभित्र मौलाएको गुटबन्दी र भेलाका सम्बन्धमा सोधिएको प्रश्नमा सिटौलाले यसलाई स्वभाविक प्रक्रियाको रूपमा चित्रण गरे । ‘पार्टीमा गुटगत भेला हुने कुरा नयाँ होइन, यो पहिले पनि हुने गरेको थियो र अहिले पनि भइरहेको छ,’ उनले थपे, ‘अहिले भइरहेका भेलाहरूबाट प्रतिनिधिमूलक र रचनात्मक सुझावहरू प्राप्त भइरहेका छन्, जसले पार्टीलाई बलियो बनाउन मद्दत पुग्नेछ ।’
प्रतिक्रिया दिनुहोस्
यस लेखमा प्रतिक्रिया बन्द गरिएको छ।