विराटनगर । छिमेकी भारतीय राज्य पश्चिम बंगालमा हुने विधानसभा निर्वाचनको सुरक्षालाई दृष्टिगत गर्दै नेपालका पूर्वी सीमानाकाहरू ७२ घण्टाका लागि बन्द गरिएका छन्। सोमबार साँझ ६ बजेदेखि लागू भएको यो नियमअनुसार झापाको काँकडभिट्टा, भद्रपुर र इलामको पशुपतिनगर लगायत पश्चिम बंगालसँग जोडिएका साना–ठूला सबै नाकाहरूबाट मानिस र सवारीसाधनको आवतजावत पूर्ण रूपमा ठप्प पारिएको छ। भारतीय प्रशासनले वैशाख १० गते हुने मतदानका क्रममा हुन सक्ने सुरक्षा जोखिमलाई मध्यनजर गर्दै नाका सिल गर्न नेपाली पक्षलाई अनुरोध गरेपछि यो कदम चालिएको हो।
अहिले बन्द गरिएका यी मुख्य नाकाहरू वैशाख १० गते मतदान प्रक्रिया पूर्ण रूपमा सकिएपछि मात्र पुनः सञ्चालनमा आउनेछन्। सीमा बन्द गरिएको अवधिमा सर्वसाधारण र सवारीसाधनलाई रोक लगाइए पनि मानवीय संवेदनशीलतालाई ध्यान दिँदै उपचारका लागि जाने बिरामी र अति आवश्यक कामका लागि हिँडेका व्यक्तिहरूलाई भने परिचयपत्रका आधारमा आवतजावत गर्न दिइने व्यवस्था मिलाइएको छ।
त्यसैगरी, नेपाल र बंगलादेशका पर्यटकहरूले आफ्नो मुलुक जानका लागि परिचय खुल्ने आधिकारिक कागजात देखाएमा उनीहरूलाई सीमा पार गर्न भारतीय सुरक्षाकर्मीले सहजीकरण गरिदिने भएका छन्। निर्वाचनका बेला सीमा क्षेत्रमा हुन सक्ने अवान्छित गतिविधि रोक्न र शान्ति सुरक्षा कायम राख्न विगतमा पनि यसैगरी दुवै देशको सहमतिमा नाका बन्द गर्ने प्रचलन रहँदै आएको छ। १० गते साँझपछि मात्र सीमामा पुनः पहिलेकै जस्तो चहलपहल सुरु हुनेछ।
प्रतिक्रिया दिनुहोस्
यस लेखमा प्रतिक्रिया बन्द गरिएको छ।