विराटनगर । प्रधानमन्त्री केपी शर्मा ओलीविरुद्ध अख्तियार दुरुपयोग अनुसन्धान आयोगमा उजुरी परेको छ ।
पार्टी कार्यालय निर्माणका नाममा जग्गा लिएको र व्यापारीले भवन पनि बनाइदिने भनेको भन्दै ओलीविरुद्ध उजुरी परेको हो ।
सिन्धुलीका युवराज पौडेल (सफल)ले अख्तियारमा बिहीबार उजुरी दिएका हुन् । उजुरीमा भ्रष्टाचार निवारण ऐन २०५९ द्वारा आवश्यक अनुसन्धान गरी हदैसम्म कारबाही माग गरिएको छ । अख्तियारमा दर्ता भएको अभियोगबारेको मुद्वाको दर्ता नम्बर सी–०२३६२३० रहेको छ ।
भ्रष्टाचार निवारण ऐन २०५९ (संशोधन सहित)ले दान दातव्य उपहार वा चन्दा लिने कार्यलाई भ्रष्टाचार मानेको भन्दै उजुरीमा देशकै प्रधानमन्त्री कानुन उल्लङ्घन गरेको उल्लेख छ । भाटभटेनी सुपर मार्केटका अध्यक्ष मीनबहादुर गुरुङले एमालेको केन्द्रीय पार्टी कार्यालयको निर्माण गर्नको लागि कुल १० रोपनी १४ आना जग्गा उपलब्ध गराएपछि पछिल्लो समय यो विषय विवादमा छ ।
उजुरीमा ओली र भाटभटेनी प्रालिका अध्यक्ष मिनबहादुर गुरूङलाई भ्रष्टाचार अभियोगमा हदैसम्मको कार्वाही माग गरिएको छ । सरकार वादी मुद्दा अभियोग खेपिरहेका गुरूङले सरकारको नेतृत्व गर्ने पार्टीको कार्यालयको लागि जग्गा दिनु र भवन बनाइदिनु भ्रष्टाचार भएकोले दुबै जनालाई भ्रष्टाचार निवारण ऐन अन्तरगत तत्काल पक्राउ गर्न पनि उजुरीमा माग गरिएको छ ।
