बेलबारी । मोरङको बेलबारी–११ लक्ष्मी मार्गका लक्ष्मीमार्ग सांस्कृतिक तथा औद्योगिक महोत्सवको आयोजना गरिने भएको छ ।
आयोजक डाँगी हाट यूथ क्लबले पत्रकार सम्मेलनको आयोजना गरी महोत्सवका बारेमा जानकारी गराएको छ । महोत्सव मङ्सिर १८ गते देखि पुस १ गतेसम्म सञ्चालन हुनेछ । स्थानीय उत्पादनको बजारीकरणका लागि कृषि उत्पादनका १५ वटा स्टल राखिने छ । स्थानीयले उत्पादन गरेका हस्तकलाका उत्पादनको प्रदर्शनीका निःशुल्क स्टल व्यवस्था मिलाइएको छ । यस्तै विभिन्न जात जातिका खानाको प्रदर्शनी र व्यापार प्रवर्द्धनका लागि १५ वटा स्टलको व्यवस्थापन गरिने छ ।
दैनिक राष्ट्रिय स्तरका कलाकारले गीत सङ्गीत पस्किने महोत्सवमा दैनिक ३ हजार बढीले अवलोकन गर्ने आयोजक समितिका संयोजक ज्ञानुराज राईले बताए । राईका अनुसार महोत्सवको जावलाखेल ग्रुप अफ इन्डष्ट्रिजले प्रायोजन गरेको छ ।
महोत्सवका आर्थिक संयोजक शिवकुमार राईले मेला आयोजनाका लागि ४१ लाख ५ हजार रुपियाँ खर्च हुने अनुमान गरिएको बताए । महोत्सवबाट ६ लाख रुपियाँ आम्दानी हुने अनुमान गरिएको छ ।
महोत्सवको उद्घाटन प्रदेशसभा सदस्य सांसद ज्ञानेन्द्र सुवेदीले गर्ने आयोजकले जनाएको छ ।
