सम्पादकीय
आईसीसी टी–२० विश्वकप छनोट क्रिकेट प्रतियोगिताको उपाधि ओमानले जितेपनि नेपाल विश्वकपमा नेपालले एक दशकपछि आफ्नो सहभागिता यसअघि नै सुनिश्चित गरिसकेको छ । एसियाली क्षेत्रको अन्तिम चरणको छनोट प्रतियोगिताको फाइनल खेल सुपरओभरमा धकेलिँदा नेपाल उपविजेता बन्यो । यद्यपी सेमिफाइनलमा सफलता प्राप्त गरेर नेपाली खेलाडी सिंगो नेपाललाई खुसी बनाइसकेका थिए । किनकि सेमिफाइनलमा विजेता टोली स्वतः आगामी वर्ष हुने विश्वकपको लागि छनौट भएको थियो । छनौट चरणको फाइनलमा टस जिती पहिले ब्याटिङ गर्ने निर्णय लिएको नेपालले निर्धारित ओभरमा ६ विकेट गुमाएर १८४ रन बनाएको थियो । जवाफी ब्याटिङमा ओर्लिएको ओमानले पनि निर्धारित ओभरमा ९ विकेट गुमाएर १८४ रनमात्र बनाएपछि खेल ‘सुपर ओभर’ मा गएको थियो । त्यसपछि ‘सुपर ओभर’ मा पहिले ब्याटिङ गरेको ओमानले कुनै पनि विकेट नगमाई २१ रन बनाएको थियो । जवाफी ब्याटिङमा ओर्लिएको नेपालले भने ‘सुपर ओभर’ मा एक विकेट गुमाएर १० रनमात्र बनाउन सक्यो ।
फाइनल खेलमा पराजित भएपनि आइसिसी टी–२० विश्वकपमा छनोट हुनु नेपालको ठूलो सफलता हो । नेपाली क्रिकेट टोलीका प्रशिक्षक मोन्टी देसाईले भनेजस्तै सन् २०२३ नेपाली क्रिकेटको लागि राम्रो वर्ष भएको छ । गत माघमा देसाई नेपाली राष्ट्रिय टिमको प्रशिक्षक नियुक्त भएपछि नेपाली क्रिकेटले एकपछि अर्को सफलता पाएको छ । एकदिवसीय मान्यता धरापमा परेको बेला मोन्टी आएपछि नेपालले लिग–२ को १२ मध्ये ११ खेल जितेर एकदिवसीय मान्यता मात्र जोगाएन आइसिसी एकदिवसीय विश्वकप छनोटमा पनि स्थान पक्का गरेको थियो । नेपालले त्यसपछि घरेलु मैदानमा एसिसी प्रिमियर कप जितेर एसिया कपका लागि स्थान पक्का गरेको थियो । नेपालले भारत र पाकिस्तानसँग एसिया कप खेल्ने मौका पायो । विश्वकप छनोटमा जिम्बावेमा प्रतिस्पर्धा गरेको नेपालले पाकिस्तान र श्रीलंकामा भएको एसिया कप र चीनमा भएको एसियन गेम्समा पनि भारतविरुद्ध राम्रो ब्याटिङ गरेको थियो ।
टि–२० छनौटमा नेपाली खेलाडीको प्रदर्शन कमजोर थिएन । कुशल भुर्तेलले प्रतियोगिताभरी कुल १८५ रन बनाएर सर्वाधिक रन बनाउने खेलाडीको सूचिमा रहे । सर्वाधिक विकेट लिने बलरहरुको सूचिमा नेपालका स्पिनर सन्दीप लामिछाने तेस्रो स्थानमा रहे । उनले सन्दीपले प्रतियोगिताको पाँच पालीमा कुल ९ वटा विकेट लिए । फाइनलमा पनि उनले दुई विकेट लिएका थिए । ब्याटिङतर्फ सबैभन्दा उत्कृष्ट ‘स्ट्राइकर रेट’ नेपाली ब्याट्सम्यान करण केसीको रह्यो । उनले उनको ‘स्ट्राइक रेट’ २०५.८८ रहेको थियो । एउटै खेलमा सर्वाधिक रन बनाउने ब्याट्सम्यान नेपालका कुशल भुर्तेल दोस्रो स्थानमा रहे । उनले सिंगापुरविरुद्धको खेलमा ४८ बलमा ७४ रन बनाएका थिए । भुर्तेलसहित कुशल मल्ल, आसिफ शेख, गुल्सन झा र कप्तान रोहित पौडेलले अर्धसतक बनाएका थिए । सर्वाधिक क्याच लिने खेलाडीको सूचिमा नेपालका कप्तान रोहित पौडेल ७ क्याचसहित अग्रस्थानमा रहे । नेपालका ब्याट्सम्यान कुशल भुर्तेल सर्वाधिक छक्का प्रहार गर्ने खेलाडी बने । उनले प्रतियोगितामा कुल ११ वटा छक्का र १८ वटा चौका पनि प्रहार गरेका थिए ।
पछिल्लो सफलताले नेपाली क्रिकेटमा नेपालको उत्साहजनक उपस्थिति बढाउँदै लगेको छ । पछिल्लो समयमा नेपाली खेलाडीले जुन ‘स्पिरिट’ देखाए, त्यो प्रसंशनीय छ । पछिल्ला सफलताले नेपाली क्रिकेटको उपलब्धि मात्रै नभएर खेलाडीमा आत्मविश्वास जगाउने काम पनि भएको छ । अब राज्यले क्रिकेटमा गुणात्मक लगानी बढाउन आवश्यक छ । खेलाडीको आत्मविश्वास बढाउन उनीहरुलाई सुविधायुक्त प्रोत्साहन, सुविधासम्पन्न खेलमैदानको निर्माण र खेल प्रशिक्षणमा सरकार लगानी बढाउन आवश्यक छ । नेपाललाई विश्वभर चिनाउन र नेपालको पहिचान कायम राख्ने माध्यम बन्दै गएको आशा जगाउने क्रिकेटमा ध्यान केन्द्रित गर्न आवश्यक छ । बधाई नेपाली क्रिकेट खेलाडीहरुलाई !
