विराटनगर । मंसिर ४ को निर्वाचनमा चाखलाग्दो भीडन्तको अपेक्षा गरिएको क्षेत्र हो, मोरङ ४ को प्रदेशसभा ‘ख’ । एकातिर सत्ता गठबन्धन, एमाले र जसपाबीचको त्रिपक्षीय भीडन्त नै हुन्छ कि अन्तिममा एमाले–जसपा गठबन्धनमा कुरा मिल्छ भन्ने विषयले पनि यो क्षेत्रमा नजर छ ।
जसपा र एमालेबीच भएको सहमति अनुसार यो क्षेत्र जसपाको भागमा परेको थियो । तर, अन्तिम समयमा धोका दिँदै एमालेले यो सहित मोरङको अर्को क्षेत्रमा पनि आफ्नै उम्मेद्वार उठाएको थियो ।
प्रदेशसभाका लागि यो क्षेत्रबाट एमाले नेता एवम् प्रदेश १ का पूर्वमन्त्री जीवन घिमिरे र विराटनगर महानगरका पूर्व मेयर भीम पराजुली मुख्य प्रतिष्पर्धी हुने अनुमान गरिएको छ । यहाँ जसपाका सन्जय सिंह पनि उम्मेद्वार छन् ।
जसपाका अध्यक्ष उपेन्द्र यादवले केही दिनअघि ‘एमालेसित कुराकानी भइरहेको’ बताए पनि अब जसपा र एमाले दुवै पक्ष ब्याक हुने अवस्थामा नरहेको स्थानीय नेताहरु बताउँछन् । यसले त्रिपक्षीय भीडन्त हुने सम्भावना बढाएको छ ।
चुनावी अभियान सञ्चालन गरिरहेका एमाले नेता घिमिरे र कांग्रेस नेता पराजुली दुवै आफूलाई प्रदेश १ को मुख्यमन्त्रीका आकांक्षीसमेत मान्छन् । विराटनगरका पूर्व मेयर पराजुली पार्टी नेतृत्वले मुख्यमन्त्री बनाउने आश्वासन दिएपछि प्रदेशमा उम्मेदवार भएको बताउँछन् । ‘महानगरको मेयर भइसकेका कारण मुख्यमन्त्रीमा स्वभाविक दाबी छ’, पराजुली भन्छन्,‘नेताहरुले मुख्यमन्त्री बनाउने भनेपछि प्रदेशमा आएँ ।’ उनी आफू चुनाव जित्ने दाबी गर्छन् । महानगरको नेतृत्वमा बसेर गरेको कामका कारण चुनाव जित्ने उनी बताउँछन् ।
पराजुलीका प्रतिस्पर्धी एमाले उम्मेदवार घिमिरेले पनि चुनावी अभियानका क्रममा आफूलाई भावी मुख्यमन्त्रीको उम्मेदवारका रुपमा प्रस्तुत गर्ने गरेका छन् । उनी शेरधन राई नेतृत्वको सरकारमा सामाजिक विकासमन्त्री थिए । एमालेमा लामो समय माधवकुमार नेपाल समूहमा रहेका उनी २०७४ सालको निर्वाचनपछि प्रदेशमा पार्टीको संसदीय दलको नेता छनोटका लागि भएको मतदानमा आफ्नो पक्षका नेता भीम आचार्यलाई छाडेर शेरधन राईको पक्षमा उभिएका थिए ।
सामाजिक विकास मन्त्री हुँदा गरेका कामलाई देखाएर उनले मत मागिरहेका छन् । कोरोना महामारीका बेला कोसी अस्पतालमा निशुल्क कोभिड अस्पताल सञ्चालन गरेको, विराटनगरको शहीद मैदानमा रात्रीकालीन फुटबल सञ्चालनका लागि फ्लडलाइट जडान गरेकोलगायत काम देखाएर उनी मतदातामाझ पुग्दैछन् ।
उनले आफूले चुनाव जित्ने दाबी गरे । मुख्यमन्त्रीबारे सोधिएको प्रश्नमा उनी भन्छन्, ‘अहिले चुनावी घरदैलोमा छौं, चुनाव जित्ने प्रमुख विषय हो । भोलि प्रक्रियामा गएपछि दाबी रहन्छ ।’
