कटहरी गाउँपालिका उपप्रमुख सरदारद्वारा सरकारी गाडी दुरुपयोग

विराटनगर । मोरङको कटहरी गाउँपालिका उपप्रमुख मन्जिताकुमारी सरदारले सरकारी गाडी दुरुपयोग गरेको भेटिएको छ ।

सरदारले सोमबार सरकारी गाडी लिएर जोगवनी पुगेको स्थानीयले दाबी गरेका छन् । उक्त दाबीबारे उपप्रमुख सरदारले पनि पुष्टि गरिन् । उनी चढ्दै आएको गाउँपालिकाको बा १ झ ४२४१ नम्बरको निशानको गाडीसहित सोमबार बिहान उनी जोगवनी पुगेकी थिइन् । गाडीमा उनले झण्डै आधा दर्जन कपडाको पोका हालेको तस्बिरमा देखिन्छ ।

गाडी दुरुपयोग भएको विषयमा प्रतिक्रिया दिँदै उपप्रमुख सरदारले आफ्नो ठूलो छोराको विवाह भएको कारण सामान किन्न जोगवनी गएको बताइन् । ‘मलाई मेरो गाडीले जोगवनी सिमानासम्म पुर्याएर छोडेको हो,’ उनले भनिन्, ‘मेरो ठूलो छोराको विवाह हुन लागेको थियो, त्यसकारण सपिङका लागि गएको हुँ ।’ गाडी धेरै समय आफूलाई पर्खेर नबसेको उनले बताइन् ।

स्थानीका अनुसार सरदारको दिदीको छोरा सुरज सरदारको आउँदो माघ १८ गते विवाह हुने तय भएको छ । सोही विवाहको सरसामान किन्न प्रायः जसो सरकारी गाडी लिएर जाने गरेको उनीहरु बताउँछन् ।