विराटनगर । विपन्नका लागि ‘स्वास्थ्य कार्यक्रम’ अवधारणा राम्रो भएको नेपाल चेम्वर अफ कमर्शले बताएको छ । सामाजिक विकास मन्त्री उषाकला राईले भेटी चेम्वर अफ कमर्शको प्रदेश र जिल्ला समितिको प्रतिनिधि मण्डलले प्रदेश १ सरकारले ल्याउन लागेको विपन्नका लागि ‘स्वास्थ्य कार्यक्रम’ को अवधारणा राम्रो रहेको बताएको हो ।
चेम्वर अफ कमर्शका प्रदेश १ अध्यक्ष सुरेशमान श्रेष्ठले अवधारणा राम्रो भएपनि चुनौतिपूण रहेको बताए । उनले विपन्नका लागि ‘स्वास्थ्य कार्यक्रम’बारे लक्षित वर्ग समक्ष जानकारी दिन आवश्यक रहेको बताए । उनले भने, ‘स्वास्थ्य वीमा पनि लक्षित वर्गमा पुग्न सकेन ।’ स्वास्थ्य वीमाको लाभ हुनेखानेहरुले मात्र लिईरहेको उनको भनाइ थियो । उनले कार्यक्रमको सूचीकरण गरेर मात्रै कार्यक्रम गर्दा राम्रो हुने सुझाव दिए । अध्यक्ष श्रेष्ठले कार्यक्रमको प्रचार प्रसारका लागि सामाजिक संघ संस्थाहरुसँग सहकार्य गर्नुपर्नेमा जोड दिए ।
चेम्वर अफ कमर्श विराटनगरका कार्यवहाक अध्यक्ष सुरेन्द्र गोल्छाले विपन्न वर्गले थाहा पाउने गरिको एप्स निर्माण गर्नुपर्नेमा जोड दिए । उनले एप्स निर्माणमा सहकार्य गर्न तयार रहेको बताए । कार्यक्रम राम्रो रहेको उनले बताए । मन्त्री राईले भने प्रदेश सरकारले स्थानीय उद्योगलाई पनि प्रर्वद्धन गर्दै विपन्नलाई निःशुल्क स्वास्थ्य सेवा दिनेगरि उपचार कोष निर्माणको अवधारणा अघि सारिएको बताइन् । उनले लक्षित वर्गले थाहा पाउने गरि सो कार्यक्रम सञ्चालन हुने जानकारी दिइन् ।
अभियानमा प्रदेश १ का कुनैपनि नागरिक नछुटुन भनेर न्युनतम १० रुपैयाँदेखि माथि जतिपनि कोषमा राख्न सकिने अवधारणा तय गरिएको मन्त्री राईको भनाइ छ । गरिव जनता स्वास्थ्य सेवाबाट बञ्चित हुनु नपरोस भनेर अवधारणा ल्याईएको उनले बताइन् ।
