विराटनगर । विराटनगरका युवा अमित रौनियार (अमित राज)ले भारतीय चलचित्र क्षेत्रमा अभिनयको अवसर पाएका छन् ।
विगत १० वर्षदेखि भारतमा अभिनय र मोडलिङ गर्दै आएका थिए । उनले केही दिन अगाडिदेखि मात्रै भारतीय चलचित्र मुम्बाई तथा चेन्नई (मद्रास)मा अभिनय गर्ने अवसर पाएका हुन् ।
विराटनगर महानगरपालिका–१० का मोहनकुमार रौनियारका ३० वर्षे छोरा अमित चाटर्ड एकाउण्ट अध्ययनका लागि भारतको नयाँ दिल्ली पुगेका थिए । तर उनी अध्ययनलाई विश्राम दिँदै आफ्नो रुचिको क्षेत्र चलचित्र र मोडलिङ तर्फ मोडिएका छन् ।
भक्तपुरमा गएको फागुन १४ गते सम्पन्न इन्टरनेशनल फैसन शो बेस्ट मेल मोडलको उपाधि समेत ग्रहण गरेका अमित विराटनगर आउँदा उनलाई शुभेच्छुकहरुले भव्य स्वागत समेत गरेका थिए ।
कलाकार अमितले इन्टरनेटमा प्रशारण हुने हिन्दी वेव सिरिज ‘ए दिल है मुस्किल’, दक्षिण भारतीय कन्नड भाषाको ‘रामाचारी टु पेन जिरो’ (रामायण कथामा आधारित), हिन्दी चलचित्र मितेजलगायतमा अभिनय गरिसकेका छन् ।
यसैगरी अमितले अभिनय गरेको ‘तेरा लव मेरा इश्क’ गीतको भिडियो भारतको प्रसिद्ध सङ्गीत कम्पनी टि सिरिजले चाँडै सार्वजनिक गर्न लागेको छ । रौनियारले सन् २०१३ मा मिस्टर एण्ड मिस दिल्लीमा बेस्ट फिजिक्स, सन् २०१७ मा मिस्टर उत्तराखण्डमा दोश्रो उपाधि हासिल गरेका थिए ।
नेपालबाट भारतमा गएर अभिनयमा टिक्नु आफ्नो लागी गर्वको विषय भएको अमितले बताए । ‘विश्वमै भारतीय कलाकारसँग प्रतिस्पर्धा गर्नु चानचुनको कुरा होइन, यस क्षेत्रमा निकै धेरै प्रतिस्पर्धा छ’, उनले भने, ‘जो कलाकार समयसँग चल्न सकेनन् उनीहरु त्यही दिनदेखि विश्राम लिनुपर्छ भन्ने मलाई लाग्छ ।’
