काठमाडौं । कोरोना भाइरसका कारण मृत्यु भएकी सिन्धुपाल्चोककी २९ वर्षीय महिलाको १३ दिने शिशुसहित परिवारका सदस्यको रिपोर्ट नेगेटिभ आएको छ।
धुलिखेल अस्पतालमा गरिएको पिसिआर परीक्षणमा सबैको रिपोर्ट नेगेटिभ आएको अस्पतालले जनाएको छ ।
सुत्केरी महिलाको मृत्युपछि परीक्षण गर्दा उनमा कोरोना भएको पुष्टि भएको थियो । त्यसपछि शिशुसहित परिवारका चार जना सदस्यलाई आइसोलेसनमा राखेर स्वाब परीक्षण गर्दा रिपोर्ट नेगेटिभ आएको हो ।
मृतकको नवजात शिशुसहित श्रीमान, आमा र बहिनीको रिपोर्ट नेगेटिभ आएको धुलिखेल अस्पतालका प्रवक्ता डा.सुमनराज ताम्राकारले जानकारी दिनुभयो । रिपोर्ट नेगेटिभ आएपछि उनीहरुलाई क्वारेन्टाइनमा पठाइने भएको छ ।
सिन्धुपाल्चोको बाह्रविसे नगरपालिका ९ राम्चे घर भएकी महिलाको गत बिहीबार साँझ धुलिखेल अस्पताल ल्याउने क्रममा मृत्यु भएको थियो। उनले गत बैशाख २४ गते काठमाडौंको टिचिङ अस्पतालमा शिशुलाई जन्म दिएकी थिइन्।
