विराटनगर । विराटनगरमा एक किशोरीको अपहरण गरी बलात्कार गर्ने युवालाई प्रहरीले पक्राउ गरेको छ ।
विराटनगर ४ इक्राही स्थित १७ बर्षिया किशोरीलाई अपहरण गरी मकैबारीमा लगेर बलात्कार गरेको आरोपमा विराटनगर ५ का २४ वर्षीय विरेन गडेरी पाल पक्राउ परेका हुन् ।
किशोरीलाई पालले मुख थुनेर कराउन, चिच्याउनसमेत नदिई ज्यान मार्ने धाकधम्की दिएर मकैबारीभित्र लगेर बलात्कार गरेको प्रहरीले जनाएको छ । किशोरीलाई घर नजिकबाट मुख थुनेर काँधमा बोकेर मकैबारीमा लगेपछि उनले बलात्कार गरेको जिल्ला प्रहरी कार्यालय मोरङका प्रवक्ता प्रहरी नायव उपरीक्षक मानबहादुर राईले जानकारी दिनुभयो ।
शुक्रबार विहानको घटनापछि फरार रहेका उनलाई प्रहरीले केही समयपछि पक्राउ गरेको हो । आरोपी पाललाई प्रहरीले जिल्ला अदालत मोरङमा जर्बदस्ती करणी आरोमा मुद्दा दर्ता गराएको छ । प्रहरीले आफुलाई सो सूचना प्राप्त भएलगत्तै आरोपी गडेरी पाललाई विराटनगर ४ स्थित इक्राही दिहबारबाबा थानको छेऊबाट विहानै पक्राउ गरेको हो ।
प्रहरीका अनुसार दुई बालिका बिहान ‘मर्निङ वाक’मा निस्किएको बेला वीरेनले एक जनालाई उठाउँदै काँधमा हालेर लगी बलात्कार गरेका थिए । सँगै हिँडिरहेकी साथीलाई उठाएर लगेपछि आत्तिएकी अर्की बालिका चिच्याउँदै घर गएर अभिभावक र छिमेकीलाई घटनाका बारेमा सुनाएकी थिइन्।
बलात्कारपछि बालिकालाई छाडेर भागेका वीरेनलाई स्थानीयले लखेट्दै नियन्त्रणमा लिएर प्रहरीलाई बुझाएको खुलेको छ । बालिका बलात्कार गर्ने वीरेनका आफन्तले घटनास्थलको मुचुल्का उठाउन प्रहरीलाई अवरोधको प्रयास गरेका थिए। उनीहरुले पीडितका आफन्त र घटनाका प्रत्यक्षदर्शीलाई आक्रमणको प्रयास समेत गरेको डीएसपी राईले बताउनुभयो।
प्रहरीलाई घटनाको अनुसन्धानमा अवरोध गर्ने र पीडित पक्षलाई आक्रमणको प्रयास गर्ने मध्ये २२ वर्षीय सुरेन्द्र गडेरी र २० वर्षीय विजय गडेरीलाई पक्राउ गरिएको राईले जानकारी दिनुभयो। पक्राउ पर्ने दुवै जना बलात्कारमा संलग्न वीरेनका भाइ हुन् ।
