विराटनगर । हाल नेपालमा मनसुनी वायुको प्रभाव बढ्दै जाँदा कोशी प्रदेशमा यसको असर सबैभन्दा बढी देखिएको छ । जल तथा मौसम विज्ञान विभागका अनुसार अहिले कोशी प्रदेशका सम्पूर्ण भूभागमा मनसुनी वायुको पूर्ण प्रभाव रहेको छ, जसका कारण यस क्षेत्रमा बदली र वर्षाको क्रम सुरु भएको छ ।
कोशी प्रदेशसँगै मधेस र बागमती प्रदेशका सबै भूभाग, गण्डकीको केही र लुम्बिनी प्रदेशको पूर्वी भूभागमा मनसुनी वायु फैलिसकेको छ । अन्य बाँकी भूभागमा भने पश्चिमी र स्थानीय वायुको आंशिक प्रभाव रहेको मौसम पूर्वानुमान महाशाखाले जनाएको छ ।
आज दिउँसो कोशी प्रदेशका पहाडी, हिमाली र तराईका सबै भूभागमा साधारणतया बदली रहनेछ । प्रदेशका पहाडी तथा हिमाली भूभागका थोरै स्थान र तराईका केही स्थानमा चट्याङ्गसहित मध्यम वर्षाको सम्भावना रहेको छ ।
यसैगरी, आज राति पनि कोशी प्रदेशमा मौसमको प्रभाव उस्तै रहने देखिन्छ । राति पहाडी र हिमाली भूभागका केही स्थानहरूमा तथा तराईका थोरै स्थानमा चट्याङ्गसहित मध्यम वर्षा हुने पूर्वानुमान छ ।
कोशीबाहेक बागमती र गण्डकी प्रदेशमा पनि आज साधारणतया बदली रहनेछ । बागमती र गण्डकीका पहाडी भूभागका थोरै स्थानमा र तराईका एक-दुई स्थानमा वर्षाको सम्भावना छ । कर्णाली र सुदूरपश्चिम प्रदेशको पहाडी भूभागमा पनि आंशिक बदली रहने र एक-दुई स्थानमा वर्षा हुन सक्नेछ ।
देशको पूर्वी र मध्य भागमा मनसुन सक्रिय भई वर्षाको सम्भावना रहँदा पश्चिम तराईमा भने गर्मीको चर्को मार कायमै छ । लुम्बिनी र सुदूरपश्चिम प्रदेशका तराई भूभागका केही स्थानहरूमा आज ‘तातो लहर’ (Heat Wave) चल्ने सम्भावना छ । साथै बागमती र गण्डकी प्रदेशका तराई क्षेत्रमा पनि आजको दिन निकै तातो हुने देखिएको छ ।
मौसम विभागले वर्षा हुने क्षेत्रमा चट्याङ्गबाट बच्न र तातो लहर चल्ने क्षेत्रमा गर्मीबाट जोगिन आवश्यक सतर्कता अपनाउन सर्वसाधारणलाई आग्रह गरेको छ ।
प्रतिक्रिया दिनुहोस्
यस लेखमा प्रतिक्रिया बन्द गरिएको छ।