काठमाडौँ । ‘समृद्ध भविष्यको आधारः जलवायु एवं प्रकृतिमैत्री विकास’ भन्ने मूल नाराका साथ आज देशभर विश्व वातावरण दिवस २०२६ विभिन्न जनचेतनामूलक कार्यक्रम गरी मनाइँदैछ । यस वर्षको दिवसलाई सप्ताहव्यापी रूपमा मनाउने योजनाअनुसार देशैभरिका सरकारी तथा गैरसरकारी निकायहरूले विभिन्न कार्यक्रमको आयोजना गरेका छन् ।
वातावरण विभागका महानिर्देशक ज्ञानराज सुवेदीका अनुसार यस वर्षको दिवस विशेष गरी प्रकृतिमैत्री विकास र जलवायु परिवर्तनले निम्त्याएका चुनौतीहरूलाई सम्बोधन गर्न केन्द्रित रहनेछ । उनले भने, ‘वातावरण संरक्षण र जलवायु परिवर्तनका चुनौतीहरूको सामना गर्न जनचेतना अभिवृद्धि गर्नु र विकासलाई प्रकृतिमैत्री बनाउनु आजको आवश्यकता हो । यसै सन्देशलाई आम नागरिकसम्म पुर्याउन हामीले विशेष कार्यक्रमहरू सञ्चालन गरेका हौँ ।
यस अवसरमा वातावरण विभागले देशभरका विभिन्न स्थानमा वृक्षारोपण, सरसफाइ अभियान, पदयात्रा र वातावरण संरक्षणसँग सम्बन्धित अन्तर्क्रियात्मक कार्यक्रमहरू सञ्चालन गरिरहेको छ । जलवायु परिवर्तनको जोखिममा रहेको नेपालका लागि यस्ता दिवसहरूले नीतिगत तहदेखि समुदायसम्म सचेतना फैलाउन महत्त्वपूर्ण भूमिका खेल्ने विश्वास गरिएको छ ।
संयुक्त राष्ट्र संघको आह्वानमा सन् १९७४ देखि हरेक वर्ष जुन ५ तारिखलाई विश्व वातावरण दिवसका रूपमा मनाउने गरिन्छ । नेपालले पनि हरेक वर्ष यो दिवसलाई महत्त्वका साथ मनाउँदै आएको छ ।
प्रतिक्रिया दिनुहोस्
यस लेखमा प्रतिक्रिया बन्द गरिएको छ।