विराटनगर– कोशी प्रदेशको तराई भूभागमा आज अत्यधिक गर्मी बढ्ने (तातो दिन हुने) सम्भावना देखिएको छ । मौसम पूर्वानुमान महाशाखाका अनुसार कोशी प्रदेशको तराई क्षेत्रमा आज तापक्रम बढेर जनजीवन प्रभावित हुन सक्ने देखिएको हो ।
यद्यपि, आज राति भने कोशी प्रदेशका केही स्थानमा मौसममा परिवर्तन आई हल्का वर्षाको समेत सम्भावना रहेको छ । महाशाखाका अनुसार आज राति कोशी र मधेस प्रदेशका साथै देशका हिमाली भूभागमा साधारणतया बादल लाग्नेछ । कोशी प्रदेशका एक–दुई स्थानमा हल्का वर्षा हुन सक्ने महाशाखाले जनाएको छ ।
हाल नेपालको पश्चिम भूभाग आसपास उपल्लो वायुमण्डलमा रहेको न्यून चापीय प्रणाली तथा स्थानीय वायुको आंशिक प्रभावका कारण मुलुकभरकै मौसममा आंशिकदेखि सामान्य फेरबदल देखिएको छ ।
आज दिउँसो देशको हिमाली र पहाडी भूभागमा साधारणतया बादल लाग्ने छ भने तराईका भूभागमा आंशिक बादल लाग्नेछ । कोशीसँगै मधेस, बागमती र गण्डकी प्रदेशका तराई भूभागमा पनि आज ‘तातो दिन’ हुने सम्भावना छ । यस्तै, लुम्बिनी र सुदूरपश्चिम प्रदेश लगायत देशको हिमाली र पहाडी भूभागका थोरै स्थानहरूमा आज चट्याङ्गसहित मध्यमसम्म वर्षाको सम्भावना रहेको छ ।
आज राति कोशी र मधेस प्रदेश लगायत बागमती, गण्डकी, लुम्बिनी र कर्णाली प्रदेशको हिमाली र पहाडी भूभागका एक–दुई स्थानमा हल्का वर्षाको सम्भावना रहेको मौसम पूर्वानुमान महाशाखाले जनाएको छ । हाल गण्डकी र कर्णाली प्रदेशका हिमाली तथा पहाडी भूभागमा साधारणतया बादल लागेको छ भने बाँकी पहाडी भूभागमा आंशिक बादल र तराईमा मौसम मुख्यतया सफा रहेको छ ।
प्रतिक्रिया दिनुहोस्
यस लेखमा प्रतिक्रिया बन्द गरिएको छ।