जनकपुरधाम । मधेस प्रदेशका मुख्यमन्त्री कृष्णप्रसाद यादवले आज (मङ्गलबार) प्रदेश सभाबाट विश्वासको मत लिँदैछन्। सत्ता साझेदार जनमत पार्टीले समर्थन फिर्ता लिएपछि संवैधानिक व्यवस्था अनुसार मुख्यमन्त्री यादवले बहुमत सिद्ध गर्न लागेका हुन्।
बिहान ११ बजेका लागि बोलाइएको प्रदेश सभा बैठकमा मुख्यमन्त्रीले विश्वासको मतको प्रस्ताव पेश गर्ने कार्यसूची छ। जनमत पार्टीले गत वैशाख २२ गते सरकारलाई दिएको समर्थन फिर्ता लिएको थियो। कुनै पनि दलले समर्थन फिर्ता लिएको ३० दिनभित्र मुख्यमन्त्रीले विश्वासको मत लिनुपर्ने प्रावधान छ।
अङ्कगणितमा बलियो यादव सरकार
१०२ सदस्यीय मधेश प्रदेश सभामा सरकार टिकाउन ५२ सांसदको समर्थन आवश्यक पर्छ। हाल मुख्यमन्त्री यादवको पक्षमा ६३ सांसदको समर्थन रहेको दाबी गरिएको छ। जसमा नेपाली कांग्रेसका २२, जनता समाजवादी पार्टी (जसपा) नेपालका २६ र नेपाल कम्युनिस्ट पार्टीका १५ जना सदस्य रहेका छन्। तथ्याङ्क अनुसार मुख्यमन्त्री यादव सहज अवस्थामा देखिएका छन्।
जनमतभित्र खटपट: समर्थन फिर्ता, मन्त्री पदमै
सरकारलाई दिएको समर्थन फिर्ता लिए पनि जनमत पार्टीभित्र भने अनौठो विरोधाभास देखिएको छ। पार्टीले समर्थन फिर्ता लिइसकेको अवस्थामा पनि सोही दलबाट सरकारमा सहभागी अर्थमन्त्री महेश प्रसाद यादव र समाज कल्याण तथा खेलकुद मन्त्री वसन्त कुशवाहाले अझै राजीनामा दिएका छैनन्। उनीहरू हालसम्म पदमै कायम रहेकाले जनमतभित्रको आन्तरिक विवाद छताछुल्ल भएको छ।
मुख्यमन्त्रीले आज विश्वासको मत लिएपछि मधेश सरकारको आगामी यात्रा र मन्त्रिपरिषद् पुनर्गठनको बाटो खुल्ने अनुमान गरिएको छ।
प्रतिक्रिया दिनुहोस्
यस लेखमा प्रतिक्रिया बन्द गरिएको छ।