रास्वपाको पहिलो महाधिवेशन असार ७, ८ र ९ गते चितवनमा हुने

काठमाडौं । राष्ट्रिय स्वतन्त्र पार्टी (रास्वपा) ले आफ्नो पहिलो महाधिवेशन आगामी असार ७, ८ र ९ गते चितवनमा गर्ने निर्णय गरेको छ। पार्टी केन्द्रीय कार्यालय बनस्थलीमा आज बिहान बसेको केन्द्रीय समितिको बैठकले सो निर्णय गरेको हो।

बैठकको निर्णयबारे जानकारी दिँदै नेता गणेश पराजुलीले आगामी असार ७ गतेदेखि ९ गतेसम्म चितवनमा पहिलो महाधिवेशन आयोजना गरिने बताएका छन्। यसअघि पार्टी सभापति रवि लामिछानेले असार ६, ७ र ८ गते महाधिवेशन गर्ने प्रस्ताव राखेका भए पनि केन्द्रीय समितिले असार ७, ८ र ९ गतेको मिति तय गरेको हो।

आगामी महाधिवेशन र पार्टीका विविध साङ्गठनिक एजेण्डाहरूमा छलफल गर्न आज बनस्थलीमा केन्द्रीय समितिको बैठक बोलाइएको थियो। २०७९ सालमा गठन भएको रास्वपाले यसअघि निर्वाचन सकिएको छ महिनाभित्र महाधिवेशन गर्ने सैद्धान्तिक निर्णय गरेको थियो। सोही लक्ष्यअनुसार भदौभित्र महाधिवेशन सम्पन्न गरिसक्नुपर्ने कार्यतालिका रहे पनि पार्टीले असारमै महाधिवेशन गर्ने गरी तयारी अघि बढाएको हो।