काठमाडौं । भारतको इन्दोरमा एउटा यस्तो विभत्स र सनसनीपूर्ण व्यापारको खुलासा भएको छ, जसले मानवता र सामाजिक संवेदनामाथि नै गम्भीर प्रश्न खडा गरिदिएको छ। सहरका विभिन्न मुक्तिधाम तथा मसानघाटहरूमा अन्तिम संस्कारका लागि ल्याइएका शवहरूबाट लुगा र कात्रो चोरी गरी पुनः बजारमा नयाँजस्तै बनाएर बिक्री गर्ने गरिएको तथ्य फेला परेको हो।
दैनिक भास्करको विशेष रिपोर्टअनुसार, यो अवैध धन्दामा एउटा ठूलो गिरोह नै सक्रिय रहेको छ। यस गिरोहले मानिसहरूको धार्मिक आस्था, भावना र स्वास्थ्यसँग क्रूर खेलबाड गरिरहेको पाइएको छ।
घटनाको प्रकृति अत्यन्तै डरलाग्दो छ। शवलाई चितामा राख्नुअघि वा अन्तिम संस्कारका क्रममा मृतकको शरीरबाट निकालिएका महँगा सुट, साडी, ज्याकेट, तन्ना र ओढाइएका नयाँ कात्रोहरूलाई घाटमा बस्ने केही व्यक्तिहरूले संकलन गर्ने गर्छन्। संकलित ती लुगाहरूलाई लुकिछिपी निश्चित ठाउँमा पुर्याइन्छ, जहाँ तिनलाई राम्रोसँग धोइपखाली र इस्त्री (प्रेस) गरिन्छ।
यसरी सफा गरिएपछि ती लुगाहरू दुरुस्तै नयाँ देखिन्छन्। ती लुगाहरूलाई नयाँ प्याकिङमा राखेर इन्दोरको स्थानीय (शनिबारी बजार(जस्ता सस्तो बजारहरूमा बिक्रीका लागि पठाइन्छ।
रिपोर्टका अनुसार, सामान्यतया बजारमा हजारौँ रुपैयाँ पर्ने गुणस्तरीय लुगाहरू यस बजारमा मात्र ५० देखि २०० रुपैयाँसम्ममा बिक्री हुने गरेका छन्। सस्तो मूल्यमा राम्रा लुगा पाउने लोभमा विशेषगरी विपन्न वर्गका मानिसहरू यसको सजिलै सिकार हुने गरेका छन्। उनीहरूले आफूले प्रयोग गरिरहेको लुगा कुनै मसानघाटबाट ल्याइएको हो भन्ने पत्तो समेत पाउँदैनन्।
चिकित्सकहरूले यो कार्यलाई अत्यन्तै जोखिमपूर्ण र बायो हजार्ड मानेका छन्। स्वास्थ्य विशेषज्ञका अनुसार मृतकको शरीरमा भएका विभिन्न कीटाणु, ब्याक्टेरिया वा कुनै संक्रामक रोग लुगामार्फत जीवित व्यक्तिमा सर्न सक्छ। यसले गर्दा प्रयोगकर्तालाई गम्भीर किसिमको संक्रमण वा निको नहुने छालाको रोग लाग्न सक्ने उच्च सम्भावना रहन्छ।
धार्मिक र सामाजिक मान्यता अनुसार पनि मृतकको अन्तिम वस्त्रलाई यसरी व्यापारिक प्रयोजनमा ल्याउनुलाई निकै अशुभ, वर्जित र अमानवीय कार्य मानिन्छ। यस खुलासाले यतिबेला भारतभर चर्चा र त्रास पैदा गरेको छ भने प्रहरीले यसबारे थप अनुसन्धान अघि बढाएको छ।
प्रतिक्रिया दिनुहोस्
यस लेखमा प्रतिक्रिया बन्द गरिएको छ।