विराटनगर । सरकारी छाप र सरकारी कर्मचारीको दस्तखत किर्ते गरी ठगी गरेको आरोपमा पक्राउ परेका विराटनगरका कमल कुमार स्वर्णकार धरौटीमा रिहा भएका छन् ।
विराटनगर महानगरपालिका वडा नम्बर ६ बस्ने ३७ वर्षीय स्वर्णकारलाई मंगलबार मोरङ जिल्ला अदालतका न्यायाधीश केशव प्रसाद घिमिरेको इजलासले ७५ हजार रुपैयाँ धरौटीमा छाड्न आदेश दिएको हो । अदालतले तोकेको धरौटी रकम बुझाएर स्वर्णकार रिहा भएको अदालत प्रशासनले जनाएको छ ।
यातयात कार्यालय विराटनगरको परिसरभित्र लेखापढीको काम गर्ने स्वर्णकारले सेवाग्राहीलाई ठगी गरेको उजुरीपछि प्रहरीले उनलाई नियन्त्रणमा लिएको थियो । उनले को ३१ प ५५७९ नम्बरको मोटरसाइकलको बिलबुक नवीकरण गरिदिने बहानामा सरकारी छाप र छैटौँ तहका अधिकृतको नक्कली दस्तखत गरी किर्ते गरेको आरोप लागेको थियो ।
जिल्ला प्रहरी कार्यालय मोरङका अनुसार स्वर्णकारले विभिन्न सवारी साधनका दर्ता किताब -बिलबुक_ लिएर राजस्व नतिरी सरकारी छाप र हस्ताक्षर किर्ते गर्ने गरेको विशेष सूचना प्राप्त भएको थियो । सोही सूचनाका आधारमा खटिएको प्रहरी टोलीले उनलाई यातायात कार्यालय परिसरबाटै नियन्त्रणमा लिएको थियो ।
स्वर्णकार पक्राउ परेपछि उनको घरमा खानतलासी गर्दा प्रहरीले विभिन्न सवारी साधनका ११ थान दर्ता किताबहरू समेत फेला पारेको थियो । उनीविरुद्ध सरकारी कागजात किर्ते र ठगीको मुद्दा चलाइएको थियो ।
प्रतिक्रिया दिनुहोस्
यस लेखमा प्रतिक्रिया बन्द गरिएको छ।