ताप्लेजुङ । करिब १ लाख २० हजार जनसंख्या रहेको ताप्लेजुङमा २०८२ सालमा २ लाख ५० हजारभन्दा बढी पर्यटक भित्रिएका छन्, जसले जिल्लामा पर्यटन गतिविधि तीव्र रूपमा बढिरहेको देखाउँछ।
सबैभन्दा धेरै पर्यटक पाथीभरा मन्दिर मा पुगेका छन्। यहाँ मात्रै २ लाख ३८ हजार ७ सय पर्यटकले दर्शन गरेका छन्। यस्तै कञ्चनजंघा क्षेत्र मा करिब १,४०० विदेशी पर्यटकसँगै ठूलो संख्यामा आन्तरिक पर्यटक पुगेका छन्।
पाथीभरा क्षेत्रमा भने वर्षैभरि पर्यटकको आवागमन रहने गरेको छ। पाथीभरा क्षेत्र विकास समितिका कार्यकारी निर्देशक प्रजिन हाङवाङ का अनुसार यहाँ प्रत्येक महिना न्यूनतम ४ हजारदेखि अधिकतम ४८ हजारसम्म पर्यटक आउने गरेका छन्, जसअनुसार दैनिक औसत करिब ५ सय पर्यटक ताप्लेजुङ भित्रिने गरेका छन्।
कञ्चनजंघा क्षेत्रमा एक विदेशी पर्यटकसँगै औसतमा पाँच जना नेपाली पर्यटक पुग्ने गरेको कञ्चनजंघा संरक्षण क्षेत्र व्यवस्थापन परिषद्का टाँसी शेर्पा ले जानकारी दिएका छन्। उनका अनुसार पछिल्ला वर्षहरूमा आन्तरिक र बाह्य पर्यटकको संख्या झण्डै बराबरी हुँदै गएको छ।
पर्यटनका लागि मुख्य सिजन फागुनदेखि वैशाख र असोजदेखि मंसिरसम्म मानिन्छ। पछिल्लो समय भने अफ–सिजनमा पनि पर्यटक बढ्दै गएको छ।
पाथीभरा र कञ्चनजंघाबाहेक गुफापोखरी, मिक्वाखोलाको फुङफुङे झरना, सिदिङवाको ढङढङे झरना र तिम्बुङ पोखरी जस्ता गन्तव्यहरूमा पनि पर्यटकको आकर्षण बढ्दो छ।
प्रतिक्रिया दिनुहोस्
यस लेखमा प्रतिक्रिया बन्द गरिएको छ।