मृत्यु भएको ४४ दिनमा पनि मुद्दा दर्ता भएन, मुद्दा दर्ता गर्न सरकारी वकिल कार्यालयको आनाकानी

विराटनगर । विराटनगर–४ इक्राही घर भएकी जानकीदेवी मण्डलको रहस्यम मृत्यु प्रकरणमा प्रहरीले कमजोर मिसिल बनाएर सरकारी वकिलको कार्यालयलाई दिएको पाइएको छ । प्रहरीले अभियुक्त भनिएका जानकीदेवीका श्रीमान् दिलिप मण्डलसँग मिलेमतो गरेर मिसिल कमजोर बनाएको मृतक जानकीका आफन्तको दाबी छ । उता, जिल्ला सरकारी वकिलको कार्यालय मोरङले सोही मिसिलको आधारमा मुद्दा दर्ता गर्न तदारुकता भने देखाएको छैन ।

प्रहरीले अनुसन्धानको कागजात सरकारी वकिलको कार्यालयलाई बुझाइसकेको बताउने र जिल्ला सरकारी वकिलको कार्यालय मुद्दा नै नचलाउँदा पीडितहरु सशङ्कीत बनेका छन् । सरकारी वकिलको कार्यालयले यसअघि नै सो विषयमा मुद्दै नचलाउने निर्णय गरेको थियो । तर, उच्च सरकारी वकिलको कार्यालयले जिल्लाको सो निर्णय बदर गर्दै मुद्दा चलाउन आदेश गरेपनि जिल्ला वकिलको कार्यालयले अझै आनाकानी गरिरहेको छ ।

सोही कारण बुधबार जानकीदेवी मण्डलको रहस्यम मृत्यु प्रकरणमा अदालतमा मुद्दा दर्ता गराउन माग राख्दै पीडित पक्षले जिल्ला सरकारी वकिलको कार्यालय अगाडि धर्ना दिएका छन् । सुनसरी छिटाहा माइती घर भइ विराटनगर–४ इक्राही घर भएकी जानकी मण्डलको २९ जेठमा झुण्डिएको अवस्थामा शव भेटिएको थियो । मृतकका माइती पक्षले भने श्रीमान् दिलिप मण्डलले हत्या गरेर आत्महत्या देखाउन शव झुण्डाएको आरोप लगाएका छन् । दिलिप र जानकीको १८ वर्ष अगाडि मागि विवाह भएको थियो । विवाह गरेको दुई वर्षमा उनीहरुका दुई छोरा जेठो १६ वर्षीय रुपेश मण्डल र अर्का ८ वर्षका छन् ।

दिपिलले उनकी प्रेमिका र प्रेमिकाको आमासँग मिलेर जानकीलाई मारेको आफन्तको आरोप छ । उनका छोरा रुपेश पनि बुबाले आमालाई मारेको दाबी गर्छन् । मृतककी माइती पक्षले मण्डलले हत्या गरेको भन्दै उनीविरुद्ध जिल्ला प्रहरी कार्यालय मोरङमा ‘आत्महत्या दुरूत्साहन’ मुद्दामा उजुरी दिएका थिए । जानकीको मृत्यु भएको ४४ दिन वितिसक्दा पनि उक्त मुद्दा अदालतमा दर्ता नै भएको छैन ।

उच्च सरकारी वकिलको कार्यालयले मुद्दा चलाउन भनेपछि जिल्ला सरकारी वकिलको कार्यालयले अभियोग अदालत लैजाने तयारी गरेको छ । जिल्लाले उच्चले मुद्दा दर्ता गर्ने आदेश दिएपछि मात्रै मुद्दा दर्ता गर्ने भनेर आलटाल गरिरहेको छ । पीडित पक्षले भने चाँडो भन्दा चाँडो अभियोग अदालत लैजान माग राखेका छन् । ‘यसअघि पनि जिल्ला सरकारी वकिलको कार्यालयले मुद्दा नचलाउने निर्णय गर्यो । उच्चले बदर गरेर मुद्दा चलाउने निर्णय गरेको छ । जिल्ला सरकारी वकिलप्रति हामीलाई शङ्का छ । त्यही भएर अभियोग अदालत बुझाउन हामीले माग राखेका हौं,’ मृतकका आफन्त सन्तोष मण्डलले भने, ‘जे हुन्छ अदालतबाट न्याय निरुपण हुनेछ । त्यसैले चाँडो अभियोग लैजान हामी माग गर्दछौं ।’

जिल्ला सरकारी वकिलको कार्यालय मोरङका जिल्ला न्यायाधीवक्ता सुवासकुमार भट्टराईले आइतबारसम्म अभियोग अदालतमा दर्ता गर्ने बताए । ‘आत्महत्या दुरुत्साहन मुद्दा हेर्ने जिल्ला सहायक न्यायाधीवक्ता विदामा हुनुुहुन्छ । उहाँ बिहीबारसम्म कार्यालयमा हाजिर हुनुहुहुन्छ । त्यसपछि अभियोजन तयार गरेर आइतबारसम्म अदालतमा अभियोग लैजाने छौं,’ उनले भने ।