विराटनगर । मोरङ जिल्ला अदालतबाट पक्राउ पूर्जी जारी भई प्रहरीको खोजीको सूचिमा रहेका रंगेली नगरपालिका ४ का वडाध्यक्षले कार्यालयबाट नियमित काम कारवाही गरिरहेको पाइएको छ ।
सरकारी कागजपत्र किर्ते गरेर अंसियारहरुको हक लाग्ने सम्पति एक जना व्यक्तिको नाममा पार्ने प्रपञ्च गरेको आरोपमा वडाध्यक्ष अवदेश मण्डलसहित १३ जनाविरुद्ध मोरङ जिल्ला अदालतले पक्राउ पूर्जी जारी गरी अनुसन्धान अगाडि बढाउन प्रहरीलाई आदेश गरेको छ । तर प्रहरीले भने पक्राउ पूर्जी जारी भएका व्यक्तिहरुको खोजी गर्न आनाकानी गर्दै आएको छ । प्रहरीले त्यस घटनामा संलग्न एक जना आरोपीलाईमात्र पक्राउ गरेको छ । किर्ते जालसाँचीमा संलग्न भएको आरोप लागेका बाँकी १२ जना प्रतिवादीलाई प्रहरीले पक्राउ गरेको छैन ।
सगोलका अंसियारहरुको अधिकार लाग्ने सम्पति एकलौटी रुपमा हड्प्ने घटनामा वडाध्यक्ष मण्डलसहित साँची किनारामा हस्ताक्षर गर्नेहरु, मालपोत कार्यालयका लेखन्दाससहित १२ जनालाई पक्राउ गरी कारवाही गर्न अदालतले आदेश दिएको भए पनि प्रहरीले त्यस अनुसार काम नगरेको रंगेली ७ का विरेन्द्रकुमार साहले बताए । उनले बुधबार विराटनगरमा पत्रकार सम्मेलन गरी अभियुक्तहरु गाउँबस्तीमा डुलिरहेको र वडाध्यक्षले नियमित कार्यालयको काम गरिरहेको अवस्थामा प्रमाण नष्ट हुने र मुद्दा दायर गर्ने पक्षमाथि कुनै पनि सुरक्षा चुनौती खडा गर्नसक्ने सम्भावना रहेको बताए । उनले आफूहरु उनीहरुबाट असुरक्षित रहेको समेत बताए ।
सरकारी कागजपत्र किर्ते मुद्दमा मोरङ अदालतबाट पक्राउ पूर्जी जारी भएको एक हप्ता बितिसक्दा पनि वडाअध्यक्ष मण्डलसहित १२ जनालाई प्रहरी कारवाहीको प्रक्रिया अगाडि नबढाएको भन्दै उनले आक्रोश पोखे । अनुसन्धान गर्ने निकायबाट भएको व्यवहारले आफूहरुले न्याय नपाउनेमा नै उनले आशंका व्यक्त गरे ।
यो घटनामा मोरङ प्रहरीमा १ जेठमा जाहेरी दर्ता भएपछि गत जेठ ९ गते मोरङ अदालतबाट वडाअध्यक्ष मण्डलसहित १३ जना विरुद्ध सरकारी कागजपत्र किर्ते गरेको मुद्दामा पक्राउ पूर्जीसमेत जारी भएको छ । जसमध्ये प्रहरीले एकलौटी रुपमा आफ्नो आममा नाममा जग्गा नामसारी गराउने राजकिशोर साहलाई मात्रै पक्राउ गरेको छ ।
वडाध्यक्षसहित १३ जना मिलेर रंगेली–४ आमतोलामा रहेको करिब ३ करोड पर्ने नक्सा सिट नं. १७८०७१८ को किता नं. १५६ र १५७ रहेको २०५ र ३३८.६३ वर्ग मिटरको जग्गा र उद्योग कब्जा गर्ने प्रयास भएको छ । स्थानीय ७९ वर्षीय रामप्रसाद साहको नाममा रहेको जग्गा र उद्योग जेठी श्रीमती र जेठीपट्टीका छोराको हक हनन गरी कान्छी श्रीमतीको नाममा ल्याउन रंगेली–४ का वडाअध्यक्ष मण्डलसहितले अनधिकृत लेनदेन गरी पदको दुरुपयोग गरेको उनीहरुको आरोप छ ।
वडाअध्यक्षको अवैध कामलाई रंगेली नगरपालिकाका उपप्रमुख भुमा पराजुली (निरौला) का श्रीमान गणेश निरौला, मालपोत कार्यालय विराटनगरका तामेली फाँटका प्रमुख तुलसीराम चौधरी, मालपोत कार्यालय रंगेलीका मुद्दा फाँटका प्रमुख अर्जुन घिमिरे, लेखापढी व्यवसायी लोकनाथ निरौलासहित १३ जनाले साथ दिएको उनीहरुको आरोप छ ।
घर र उद्योगसहित करिब तीन करोड रुपैयाँ मूल्य पर्ने जग्गा किर्ते गरी कब्जा गर्ने प्रयत्न भएको पीडित पक्षले जनाएको छ । उनका अनुसार मालपोत कार्यालयमा यसअघि भएको अंश भपाईमा केरमेट गरी किर्ते गरिएको र त्यसका आधारमा सम्पतिमा एकलौटी गर्ने निर्णय विभिन्न निकायबाट हुँदै गएको हो । तर, अर्का अंशियारसँग अंश भर्पाइको सक्कल कागज भएका कारण उनीहरुले किर्ते गरेको खुलेको थियो ।
दुई पत्नीका पति रामप्रसाद साहको अघिल्लो वर्ष मृत्यु भएपछि जेठी श्रीमती कलावतीदेवध्ी र कान्छी कौशिला देवी साह तथा जेठीतर्फका छोरा विरेन्द्रकुमार साह र कान्छीतर्फका छोरा राजकिशोरको नाममा सम्पति भाग लाग्नुपर्नेमा कौशिलालाई सबै सम्पति दिलाइदिने प्रपञ्च गरिएको थियो । वडादेखि नगरपालिका र मालपोतको मिलेमतोमा जग्गा कौशीलादेवी साहको नाममा नामसारी भइसकेको छ । जेठा छोरालाई पत्तो नदिइ कान्छी आमाको नाममा बाबुको सम्पति लगिएको हो । जग्गा नामसारी भएको १० महिनापछि मात्र विरेन्द्रले घटनाबारे पत्तो पाएका हुन् । त्यसपछि उनले मालपोतमा गएर बुझ्दा सरकारी कागजपत्र किर्ते गरेको थाहा पाएपछि प्रहरीमा १ जेठमा जाहेरी दर्ता गराएका हुन् ।
अदालतबाट पक्राउ पूर्जी जारी भएपछि सो प्रकरणमा संलग्न वडाध्यक्षसहित १३ जना नै सुरुमा फरार भएका थिए । वडाअध्यक्ष पनि केही दिन फरार भए । तर पछि राजनीतिक आडभरोसामा उनीहरु गाउँ फर्केर खुलेआम डुलिरहेका छन् । वडाध्यक्ष मण्डललाई रंगेलीका मेयर दिलिप बगडिया र उपमेयरसमेतले संरक्षण गरेको र उनीहरुकै दबाबमा प्रहरीले एक जना बाहेक बाँकीलाई पक्राउ नगरेको पीडितहरुले आरोप लगाएका छन् ।
‘अहिले पनि खुल्लेआम सार्वजानिक ठाउँमा वडाध्यक्ष मण्डल हिंडडुल गरेका छन् । जसले गर्दा कानुनी राज्यमा राज्य र राज्यका निकायहरु पीडितको पक्षमा हुनुपर्ने हो । तर, अहिलेका काम कारवाही हेर्दा कता कता पीडित पक्षमा नदेखिएको महसुस भएको छ । अहिले भइरहेको काम कारवाही हेर्दा पनि पारदर्शी ढंगले अनुसन्धान नभएको प्रष्ट देखिन्छ,’ उनले भने, ‘पक्राउ पूर्जीमा उल्लेखित दुई व्यक्ति वडाध्यक्ष र रंगेली नगरपालिका उपप्रमुखका पति नेकपा एमालेसँग सम्बद्ध छन् र नेकपा एमाले अहिले सत्तामा भएकोले हामीले न्याय पाउँदैनौं कि भन्ने चिन्ता लागेको छ ।’
५ महिना १२ दिन अगाडी सर्जमिन प्रमाणित भएको कागजलाई लामो समय रोकेर गलत सिफारिस लेखिदिएका कारण पैत्रिक सम्पतिमाथि हक लाग्ने परिवारका सदस्यहरु जालसाँचीबाट ठगीमा पर्नुपर्ने अवस्था आएको विरेन्द्रकुमार साहले बताए । ‘ ५ महिना १२ दिन रोकेर पछि हामीसँग सरोकारसम्म नराखी त्यस्तो सिफारिस कसरी दिइयो ? के कुराले उनीहरुलाई यस्तो प्रभाव परेको हो ? छिटो पक्राउ गरी छानविन गर्न र कडा कारवाही गर्न हाम्रो माग छ ।’
अदालतले पक्राउ गर्नु भनेर आदेश गरिसकेका आरोपितहरुलाई पक्राउ नगरी अनुसन्धान गर्ने हो भने यो मुद्दा प्रभावित हुनसक्ने उनीहरुको आशंका छ ।
