विराटनगर। ‘बजरंग’ ब्रान्डमा टीएमटी छडको उत्पादन गरिरहेको स्वस्तिक रोलिङ मिल्सले भारतको टाटा आइरन एन्ड स्टिल कम्पनीबाट बेस्ट भ्यालुड कस्टमर अवार्ड पाएको छ ।
कोलकाताको ओबराय ग्रान्ड होटलमा आयोजित कार्यक्रममा टाटा स्टिलका प्रबन्ध निर्देशक आशिष अनुपमले स्वस्तिक रोलिङका निर्देशक रमेश राठीलाई अवार्डले सम्मानित गरेका हुन् ।
सुनसरीको दुहबीमा रहेको स्वस्तिक रोलिङले एक वर्षदेखि व्यावसायिक उत्पादन गरिरहेको छ । उद्योगले ‘बजरंग’ ब्रान्डमा टीएमटी छडका साथ एंगल, च्यानल र आई बिमको पनि उत्पादन गरिरहेको छ ।
एंगल, च्यानल र आई बिमको प्रयोग साना–ठुला सबै खाले घर बनाउन, घरमा ट्रस हाल्न, विद्युत् प्रसारण लाइनको टावर बनाउन, इन्टरनेट र रेडियोको टावर बनाउन, साना–ठुला सेड बनाउन लगायत विविध प्रयोजनमा गरिन्छ । स्वस्तिकले व्यावसायिक उत्पादनको एक वर्ष नपुग्दै टाटा आइरन एन्ड स्टिलबाट अवार्ड प्राप्त गरेको हो ।
टाटा स्टिल भारतको ठूलो र ब्रान्डेड फलाम उद्योग हो । यसले फलामका गुणस्तरीय मालवस्तु र कच्चा पदार्थको उत्पादन गर्दै आएको छ । यसका सबै उत्पादन भारतमा अन्य उद्योगका उत्पादनका तुलनामा गुणस्तरीय मानिन्छन् ।
स्वस्तिक रोलिङले बिलेट उत्पादन गर्न आवश्यक पर्ने कच्चा पदार्थ स्पन्ज आइरन टाटा स्टिलबाटै आयात गरिरहेको छ । टाटा स्टिलको स्पन्ज आइरन संसारमै स्तरीय मानिन्छ । टाटा स्टिलका आफ्नै फलाम खानि र प्रशोधनका कारखानाहरू भारतका विभिन्न स्थानहरूमा एक सयभन्दा बढीको संख्यामा छन् ।
उद्योगका निर्देशक राठीले उद्योगबाट उत्पादन सुरु भएको एक वर्ष नपुग्दै टाटा स्टिलबाट उत्कृष्ट ग्राहक पुरस्कार पाउनु गौरवको विषय भएको बताएका छन् । उद्योगले ७ देखि ४० एमएम सम्मका छडको उत्पादन गरिरहेको छ ।
बजरंग ब्रान्डका छडहरूको ग्रिपिङ उच्च स्तरको भएकाले यसले मसला बलियो गरी समात्न सक्ने राठीको दावी छ ।
अहिलेसम्म कुनै प्रतिक्रिया छैन। पहिलो हुनुहोस्!