सलाम मजदुरहरुको परोपकारी अभियानलाई

राष्ट्रिय स्वतन्त्र पार्टीका अध्यक्ष रवि लामिछानेले केही दिनअघि आफनो निर्वाचन क्षेत्र चितवनमा तामझाम गरेर महिलाहरुका लागि ब्लु बस सञ्चालन गरेको प्रचार गराए । पुरानो बसलाई डेन्टिङपेन्टिङ गरेर चलाइएकोे ब्लु बस सेवाको विपक्षीहरुले आलोचना पनि गरे । एमाले नेता शंकर पोखरेलले त रास्वपाले समाजमा महिला र पुरुषबिच विभेद खडा गर्न खोजेको आरोप पनि लगाए । लामिछाने आफूले गर्न लागेको ब्लु बस सेवाको आफ्ना सर्मथक मार्फत् प्रोपोगण्डाकै लयमा पहिले नै प्रचार मात्र गराएनन् मिडियाहरुले पनि खुब प्रचार गरे ।

तर, विपन्न वर्गलाई लक्षित गरेर विराटनगरमा यातायात मजदुरहरुले निःशुल्क एम्बुलेन्स र शव वाहन सेवा सञ्चालन गरिरहेको कुरा चाँँही कतै प्रचारमा आएन । किनभने परोपकार सेवा भनेको निस्वार्थ मनले गर्नका लागि हो सस्तो प्रचार हैन भनेर मजदुरहरुले त्यसलाई प्रचार प्रसारमा ल्याउन चाहेनन् । अहिले पनि प्रचारमुखी छैनन् । तर पनि राम्रो परोपकारी कामको प्रशंसा कसैले नगरेपनि आफैं हुन्छ भने झैं अहिले विराटनगरमा आफैं श्रम गरेर खानुपर्ने बाध्यतामा रहेका यातायात मजदुरहरुले सात महिना अगाडिदेखि सञ्चालन गरिरहेको निःशुल्क शव वाहन र एम्बुलेन्स सेवाको लोकप्रियता चुलिएको छ ।

अखिल नेपाल यातायात मजदुर संघ मोरङले विपन्न वर्गलाई लक्षित गरेर विराटनगर महानगर सहित आसपासमा पर्ने मोरङको बुढीगंगा, कटहरी, जहदा, ग्रामथान अनि सुनसरीको बर्जु गाउँपालिकामा यो सेवा दिइरहेको छ । हाल मजदुरहरुले एउटा बस र एउटा पिकअप जीपलाई शव वाहनका रुपमा प्रयोग गरिरहेका छन् । अनि एउटा एम्बुलेन्स पनि ।

आचारसंहिताअनुसार एम्बुलेन्सले शव बोक्न हुँदैन । भाडाका गाडीहरुले पनि हत्तपत्त शव बोक्न मान्दैनन् । मानिहाले पनि दोब्बर भाडा माग्छन् । पालिका र परोपकारी संस्थाहरुले पनि शव वाहन सञ्चालन गरेका छैनन् । गर्नेहरुले पनि सहज रुपमा विपन्न वर्गलाई सेवा दिँदैनन् । यसैले विपन्नहरुका लागि शव वाहन र एम्बुलेन्स सेवा खर्चिलो छ । सोही समस्या महशुस गरेर यातायात मजदुहरुले अस्पतालदेखि घाटसम्म शव लैजान ःिनशुल्क वाहन, आवश्यक पर्दा मलामी बस र घरबाट अस्पतालसम्म विरामी लैजान एम्बुलेन्स सेवा उपलब्ध गराउँदै आएका हुन् ।
हाल शव वाहनका लागि एउटा बस समाजसेवी करिम अन्सारी र एउटा पिकअप जीप अखिल नेपाल यातायात मजदुर संघका मोरङ अध्यक्ष रविन ठकुरी आफैंले निःशुल्क प्रदान गरेका छन् । एउटा एम्बुलेन्स चाहिँ संघले आफ्नै कोषबाट खरिद गरेर सञ्चालन गरिहेको छ । सात महिनामा मजदुरहरुले ९८ वटा शवका लागि निःशुल्क सेवा दिइसकेका छन् ।

यसैगरि दुई दर्जन बढी विरामीलाई निशुल्क एम्बुलेन्स मार्फत अस्पताल ल्याउने र अस्पतालबाट घरसम्म लगेर सेवा प्रदान गरिसकेका छन् ।
विराटनगर आसपासका पालिकामा कसैको पनि आफन्तको मृत्यु भएको वा विरामी भएको खबर प्राप्त भएमा उपलब्ध चालकहरु आफैंले निःशुल्क शव वाहन र एम्बुलेस कुदाएर व्यक्तिको घर वा अस्पतालसम्म पुग्ने गरेका छन् । त्यसपछि शव भए मलामीसँगै घाटसम्म र विरामी भए अस्पताल वा घरसम्म पुर्‍याइदिने गरेका छन् ।

अति विपन्न भएमा शवलाई घाटसम्म लगिदिने मात्र नभएर दाहसंस्कार र किरियाखर्च समेत सहयोग गर्ने गरेको अध्यक्ष अखिल नेपाल मजदुर संघ मोरङका ईन्चार्ज गोपाल लिम्बूको भनाइ छ ।गज्जब चाहिँ के भने आफ्नै चन्दा उठाएर संगठन चलाउनुपर्ने बाध्यतामा रहेका यातायात मजदुरहरुले सञ्चालन गरेको शव वाहन र एम्बुलेसन्स सेवा उनीहरुले तिर्ने मासिक लेवीबाट सञ्चालन हुँदै आएको छ । कसैले स्वेच्छाले चाहेमा कोषमा रकम जम्मा गर्न सक्ने भएपनि हालसम्म कसैले कोषमा रकम जम्मा पनि गरिदिएका छैनन् र उनीहरुले पनि कसैसँग माग्ने गरेका छैनन् । बरु आफ्नो रोजगारी नै थाँती राखेर उनीहरु सेवाका लागि पुग्ने गरेका छन् ।

हो, यसैलाई भनिन्छ वास्तविक समाज सेवा । यसैले सलाम छ यातायात मजदुहरहरुको सहयोगी भावनालाई । किनभने मजदुरहरुले यसलाई सस्तो प्रचारका रुपमा हैन बरु सेवाको भावनाले अभियानका रुपमा लिएका छन् । र, अझै उनीहरु पूर्ण सन्तुष्ट हुनसकेका छैनन् । किनभने जसका लागि भनेर उनीहरुले निःशुल्क अभियान सुरु गरे अझै ति लक्षित विपन्न वर्गले चाहिँ कम सेवा लिइरहेका छन् । उनीहरुले मजदुहरुको असल अभियानारे जानकारी नै पाउन सकेका छैनन् ।

यसैले मेरो सबै विपन्न वर्गका व्यक्तिहरुसँग आग्रह छ तपाईँहरु जोकोहीले पनि यो निःशुल्क सेवा उपभोग गर्नुहोस् । शव वाहन र एम्बुलेन्स सेवाका लागि ९७०२२९२३१८, ९८११०३६४९६, ९८५३७९०८० र ९८१९३३१६८८ मा जुनसुकै समय सम्पर्क गरेर सेवा लिनुहोस् र मनकारी मजदुहरुको अभियानलाई प्रोत्साहन गर्नुहोस् । मेरोतर्फबाट परोपकारी मजदुरहरुको अभियानलाई हृदयदेखि नै सलाम ।