विराटनगर । उदयपुरको कटारी नगरपालिका–११ लखनथुम्का बस्ने ५० बर्षीया महिलाको हत्या गरेको आरोपमा प्रहरीले एक युवक पक्राउ गरेको छ ।
खुकुरी प्रहार गरि महिलाको हत्या गरेको आरोपमा प्रहरीले स्थानीय २५ बर्षीय विनोद भनिने रोशन राना मगरलाई पक्राउ गरेको हो । मगरमाथि ५० बर्षीय डोरकुमारी राउतको हत्या गरेको आरोप छ । मगरले शनिबार बिहान करिब साढे ८ बजे घरमै बसिरहेको अवस्थामा राउतमाथि एक्कासी लछारपछार गर्नुका साथै साथमै बोकेको खुकुरीले शरिरका विभिन्न भागमा प्रहार गरेका थिए । खुकुरीले प्रहार गर्दा टाउकोमा गम्भीर चोट लाग्नुका साथै उनको घटनास्थलमै मृत्यु भएको थियो ।
ईलाका प्रहरी कार्यालय कटारीबाट खटिएको प्रहरी टोलीले फरार रहेका मगरलाई कटारी नगरपालिका–११ स्थित हात्तीसुँडेको जङ्गलबाट बिहान साँढे ११ बजे नियन्त्रणमा लिएको छ । घटनाबारे थप अनुसन्धान भईरहेको ईलाका प्रहरी कार्यालय कटारीले जनाएको छ ।
