रतुवामाई । मोरङको रतुवामाई नगरपालिकाले लकडाउनका कारण काठमाडौँमा अलपत्र परेका एक सय ९४ जनाकोे उद्धार गरी ल्याएको छ ।
काठमाडौँबाट गाउँ फर्कन चाहनेहरुलाई मंगलबार पाँचवटा बसको व्यवस्था गरी उद्धार गरेको नगरपालिकाले जनाएको छ । नगरपालिकाका प्रमुख रविन राईले मंगलबार काठमाण्डौबाट पाँच बसमार्फत अलपत्र नागरिकको उद्धार गरी ल्याएको जानकारी दिनुभयो ।
लकडाउनका कारण राजधानी काठमाडासँगै बनेपा, भक्तपुरमा अलपत्र परेका नगरबासीलाई मङ्गलबार उद्धार गरिएको मेयर राईले बताउनुभयो ।
नगरपालिकाको समन्वयमा नगरबासीको उद्धार गरिएको हो । लकडाउन थपिदै जाँदा घर जाने यात्रुहरुको संख्या बढ्दै गएपछि नगरपालिकाले उद्धार गरेको हो ।
काठमाडौंबाट ल्याइएका नगरबासीहरुलाई रतुवामाई ८ मा रहेको सरस्वती माध्यमिक विद्यालयको क्वारेनटाईनमा राखी स्वास्थ्य परिक्षण गरेर मात्र घर पठाइएको प्रमुख राईले जानकारी दिनुभयो । उद्धार गरिएका सबैलाई अभिभावकको सम्पर्क गराई होम क्वारेनटाइनमा बस्नसमेत नगरपालिकाले अनुरोध गरेको मेयर राईको भनाइ छ ।
विभिन्न संघसंस्थाहरुले बीच बाटोमा खाना खुवाएर हाम्रा लागि भगवान बनेर आए, एक व्यक्तिले भने, “ काठमाण्डौँमा भोकमरी र कोरोनाको त्रास उत्तिकै थिया,े जसो तसो गाँउघरसम्म आइपुगियो अब त भोकमरीको चिन्ता नै हरायो । ”
नगरपालिकाले उद्धार गरिएका नागरिकहरुलाई स्वास्थ्य परीक्षण पश्चात खाजा खुवाएर अभिभावकको जिम्मा लागाएको थियो ।
