काठमाडौं । सरकारले लकडाउनलाई वैशाख २५ गतेसम्म लम्ब्याउने निर्णय गरेको छ ।
मन्त्रिपरिषद्को आइतबार साँझ बसेको बैठकले वैशाख २५ गतेसम्म लकडाउन गर्ने निर्णय गरेको हो ।
चैत ११ गतेबाट सुरु भएको लकडाउन पाँचौ पटक थपिएको हो । कोभिड १९ सम्बन्धी उच्चस्तरीय समन्वय समिति अन्तर्गत गठन भएको मुख्यसचिव नेतृत्वको कार्यदलले एक साता लकडाउन थप्न सुझाव दिएको थियो ।
यसअघि सरकारले चैत ११ गतेदेखि चैत १८ गतेसम्मको लागि लकडाउन गरेकोमा त्यसपछि बढाएर चैत २५ गतेसम्म पुर्याइएको थियो । यसैगरी त्यसपछि पुनः वैशाख ३ गतेसम्म बढाएकोमा त्यसपछि पनि सरकारले वैशाख १६ गते अर्थात भोलिसम्मका लागि लकडाउन गरेको थियो । योसहित नेपालमा ४५ दिन लकडाउन हुने निश्चित भएको छ।
हालसम्म नेपालमा कोरोनाभाइरसको संक्रमण ५२ जनामा पुष्टि भइसकेको छ भने त्यसमध्ये १६ जना निको भएर घर फर्किएका छन् ।
