विराटनगर । उदयपुरको एउटै मस्जिदमा भेटिएका १२ जना कोरोना संक्रमितलाई विराटनगरको कोशी अस्प्ताल अन्तर्गतको कोभिड १९ उपचार केन्द्रमा उपचार सुरु भएको छ ।
शुक्रबार संक्रमण पुष्टि भएका एक नेपाली र ११ जना भारतीय नागरिकलाई मध्यरातमा प्रदेश १ सरकारले निर्माण गरेको उपचार केन्द्रमा ल्याइएको हो ।
कोशी अस्पताल विराटनगरकी मेडिकल सुपरीटेण्डेन्ट डा.संगीता मिश्राले संक्रमण नदेखिएकालाई अस्पतालमा भर्ना नगरेको बताउनुभयो । अस्पतालमा भर्ना भएकाहरुलाई कुनै लक्षण भने छैन । उनीहरुलाई अहिले स्वास्थ्यकर्मीले निगरानीमा राखेका छन् ।
उदयपुरको मस्जिदमा बस्दै आएका १६ जनामध्ये १२ जनालाई कोरोना संक्रमण पोजेटिभ देखिएकोमा संक्रमितको पहिचान नभएको भन्दै उदयपुरको स्थानीय प्रशासनले १६ जनालाई नै विराटनगर पठाएको थियो ।संक्रमितसँगै आएका ४ जनालाई भने मोरङको टाडीस्थित क्वारेन्टाइनमा पठाइएको छ ।
संक्रमितहरु ४ जना २८ वर्षका, २ जना २९ वर्षका छन् भने अरु ३४, २६, २२, २५, २० र ४० वर्षका छन् । राति करिब साढे ११ बजे नेपाल प्रहरीको स्कटिङमा ४ वटा एम्बुलेन्समा राखेर उनीहरुलाई नेशनल ट्रेडिङमा बनेको कोभिड १९ उपचार केन्द्रमा ल्याइएको हो ।
नेशनल ट्रेडिङमा प्रदेश सरकारले ५० शैय्याको अस्थायी कोरोना अस्पताल निर्माण गरेको छ । जसको व्यवस्थापन कोशी अस्पताल विराटनगरले गर्दै आएको छ ।
कोसी अञ्चल अस्पताल विराटनगरको प्रयोगशालामा पीसीआर विधिबाट गरिएको परीक्षणमा बिहीबार उनीहरुमा कोरोना पोजेटिभ भेटिएको थियो। सोही रिपोर्टलाई टेकुस्थित राष्ट्रिय जनस्वास्थ्य प्रयोगशालामा समेत शुक्रबार पुष्टि गरेको हो।
