भीआईपी सुरक्षामा खटिएका प्रहरीलाई सीमामा परिचालन गर्न गृहमन्त्रीको निर्देशन

विराटनगर । खुला सीमानाको कारण भारतबाट कोरोनाको जोखिम बढ्दै गएपछि गृहमन्त्री रामबहादुर थापा बादलले भीआईपीको सुरक्षामा खटिएका सुरक्षाकर्मीलाई फिर्ता गरी सीमा क्षेत्रमा खटाउन निर्देशन दिनुभएको छ ।

भारतमा कोरोना संक्रमितको संख्या बढिरहेको र खुला सीमानाको कारण नेपालमा जोखिम बढेपछि सीमा क्षेत्रमा सुरक्षाकर्मी थप्न गृहमन्त्रीले निर्देशन दिनुभएको हो । यसअघि सीमामा झन्डै १५ किलोमिटरको दूरीमा सुरक्षा विन्दुहरू रहेकोमा अहिले त्यसलाई २ देखि ३ किलोमिटरमा झारिएको छ ।

सीमा सुरक्षा चुनौतिपूर्ण बनेको बेला नेपाल प्रहरी र सशस्त्र प्रहरी बलबाट विशिष्ट व्यक्तिको सुरक्षामा खटाइएका उनीहरुलाई फिर्ता बोलाएर सीमामा पठाउन गृहमन्त्री थापाले निर्देशन दिनुभएको हो । प्रहरी महानिरीक्षक ठाकुरप्रसाद ज्ञवाली र सशस्त्र प्रहरी महानिरीक्षक शैलेन्द्र खनाललाई सोमबार बोलाएर गृहमन्त्री थापाले भीआईपी सुरक्षामा अनावश्यक रुपमा खटाइएका सुरक्षाकर्मीलाई फिर्ता बोलाउन निर्देशन दिनुभएको हो ।

निर्देशनपछि प्रहरीले विशिष्ट सुरक्षा कार्यविधि विपरित खटिएका सुरक्षाकर्मीको तथ्यांक संकलन थालेको छ । अहिले २ हजार बढी सुरक्षाकर्मी विशिष्ट व्यक्तिको सुरक्षामा खटिएका छन् । कतिपय विशिष्ट व्यक्तिले मन्त्रिपरिषदबाटै निर्णय गराएर कार्यविधि विपरित सुरक्षाकर्मी राखेका छन् । उनीहरुको हकमा मन्त्रिपरिषदबाटै निर्णय गरेर कटौती गरिने गृहमन्त्रीको तयारी छ ।

‘भीआईपी सुुरक्षामा परिचालित सुरक्षाकर्मी कटौती गरेर सीमामा पठाउनुस्’ गृहमन्त्रीको स्पष्ट निर्देशन छ । गृहमन्त्रीले पहाडी तथा हिमाली क्षेत्रमा रहेका सशस्त्र प्रहरीका कर्मचारीलाई पनि सीमामा खटाउन निर्देशन दिनुभएको उहाप्रेस संयोजक किरण भट्टराईले जानकारी दिनुभयो ।

अत्याश्वयक बाहेकका सुरक्षाकर्मीलाई सीमामा परिचालन गर्ने निर्णय गृहले गरिसकेको छ । तराईका जिल्लामा थप जनशक्ति पठाउन नेपाल प्रहरीलाई पनि गृहमन्त्री थापाले निर्देशन दिनुभएको छ ।

भारतमा कोरोना संक्रमितको संख्या बढ्दै जाँदा सीमा क्षेत्रमा विशेष सतर्कता बढाउन लागिएको हो ।