विश्वभरी महामारीका रुपमा फैलिँदै गएको कोरोना भाइरसको सङ्क्रमणको कारण शुक्रबारसम्म १० हजार ४९ व्यक्तिको मृत्यु भएको छ ।
विश्व स्वास्थ्य सङ्गठनले सार्वजनिक गरेकोे विवरणअनुसार संसारभरी २ लाख ४६ हजार १७८ जना कोरोना भाइरस सङ्क्रमित भएका छन् ।
सङ्क्रमित व्यक्तिमा ८८ हजार ४८३ जना उपचारपछि घर फर्किएका छन् । १ लाख ४७ हजार ६४६ व्यक्ति हाल सङ्क्रमित रहेका छन् । कोरोना भाइरस कोभिड–१९ को सङ्क्रमण हालसम्म १७६ भन्दा बढी देशमा देखा परिसकेको छ ।
चीनको हुबेई प्रान्तको उहान शहरबाट सुरु भएको कोभिड–१९लाई विश्व स्वास्थ्य सङ्गठनले ‘विश्वव्यापी महामारी’को सङ्ज्ञा दिएको छ । चीनको हुबेई प्रान्तको उहानबाट शुरु भएको यस कोरोना भाइरस सङ्क्रमणबाट चीनभरी ३ हजार २४८ व्यक्तिको मृत्यु भएको छ भने, ८० हजार ८६७ जना सङ्क्रमित रहेका छन् ।
कोरोना भाइरसको कारण अत्यन्त प्रभावित भएको इटालीमा ३ हजार ४०५ व्यक्तिको मृत्यु भएको छ भने ४१ हजार ३५ जना सङक्रमित रहेका छन् । इटालीमा ४ हजार ४४० व्यक्ति उपचारपछि घर फर्किएका छन् ।
इरानमा कोरोना भाइरसको सङ्क्रमणको कारण १ हजार २४८ व्यक्तिको मृत्यु भएको छ भने १८ हजार ४०७ जना सङक्रमित रहेका छन् । ५ हजार ९७९ व्यक्ति उपचारपछि घर फर्किएका बताइएको छ ।
स्पेनमा कोरोना भाइरसको सङ्क्रमणको कारण ८३१ व्यक्तिको मृत्यु भएको छ । १८ हजार ७७ जना सङक्रमित रहेका छन् भने १ हजार १०७ व्यक्ति उपचारपछि निको भएर घर फर्किएका छन् । यस्तै जर्मनी कोरोना भाइरसको सङ्क्रमणको कारण ४४ व्यक्तिको मृत्यु भएको छ भने १५ हजार ३२० जना सङक्रमित रहेका छन् । त्यहाँ ११५ जना उपचारपछि निको भएर घर फर्किएका छन् ।
संयुक्त राज्य अमेरिकामा कोरोना भाइरस सङ्क्रमणको कारण २१७ व्यक्तिको मृत्यु भएको छ भने १४ हजार ३६५ जना सङक्रमित रहेका छन् । अमेरिकामा १२५ जना उपचारपछि निको भएर घर फर्किएका छन् ।
फ्रान्समा कोरोना भाइरस सङ्क्रमणको कारण ३७२ व्यक्तिको मृत्यु भएको छ । हाल १० हजार ९९५ जना सङक्रमित रहेका र १ हजार २९५ उपचारपछि निको भएर घर फर्किएको बताइएको छ ।
कोरियामा कोरोना भाइरस सङ्क्रमणको कारण ९४ व्यक्तिको मृत्यु भएको र ८ हजार ६५२ सङ्क्रमित रहेको बताइएको छ । त्ययहाँ २ हजार २३३ उपचारपछि निको भएर घर फर्किएका छन् ।
स्विजरल्याण्डमा कोरोना भाइरस सङ्क्रमणको कारण ४३ व्यक्तिको मृत्यु हूँदा ४ हजार २२२ सङ्क्रमित छन् भने १५ जना भने उपचारपछि घर फर्किएका छन् । बेलायतमा कोरोना भाइरस सङ्क्रमणको कारण १४४ व्यक्तिको मृत्यु भएको छ । ३ हजार २६९ सङ्क्रमित छन् भने ६५ जना भने उपचारपछि निको भएर घर फर्किएका छन् ।
ारतमा हालसम्म कम्तीमा २०१ वटा कोरोनाभाइरस सङ्क्रमणका घटना देखापरेका छन् । ५ जनाको मृत्यु भएको छ । देशभर विद्यालय र कलेज बन्द गरिएका छन् र धेरै राज्यले भीडभाडमा प्रतिबन्ध लगाएका छन् । पाकिस्तानमा कोरोनाभाइरस सङ्क्रमितको सङ्ख्या ३०७ पुगेको छ भने २ जनाको मृत्यु भएको छ ।
श्रीलङ्कामा ६०, अफगानिस्तानमा २२, बङ्गलादेशमा १४ र माल्दिभ्समा १३ वटा सङक्रमण हालसम्म देखा परेको विश्व स्वास्थ्य संगठनले जनाएको छ । (एजेन्सी)
