विराटनगर । विराटनगर महानगरपालिकाका दलित महिला जनप्रतिनिधिका लागि आजदेखि तीन दिने उद्घोषण तथा नेतृत्व विकास संवन्धिको तालिम शुरु भएको छ ।
विराटनगर महानगरपालिका वडा नं. १ को आयोजनामा शुरु भएको तालिममा १९ वटै वडाका दलित महिला जनप्रतिनिधिको सहभागिता रहेको छ ।
दलित महिला जनप्रतिनिधिहरुको क्षमता विकास गर्ने उद्देश्यले उद्घोषण र नेतृत्व विकास संवन्धिको तालिम आयोजना गरिएको वडाध्यक्ष उद्धव अर्यालले बताउनुभयो । तालिमको शुभारम्भ गर्दै विराटनगर महानगरपालिकाकी उपप्रमुख इन्दिरा कार्कीले जनप्रतिनिधिहरुले आत्मविश्वासका साथ कुरा राख्न सक्नुपर्ने बताउनुभयो ।
तालिमबाट महिला जनप्रतिनिधिको क्षमता विकास हुने विश्वास गरिएको छ । कार्यक्रममा नेपाल दलित संघ मोरंग जिल्ला अध्यक्ष रामकुमार विश्वकर्मा, नेपाल महिला संघ मोरंगकी सचिव प्रमिला थापा लगायतले शुभकामना मन्तव्य व्यक्त गर्नुभएको थियो ।
