पुँजी बजारमा २६ प्रतिशत नागरिकको पहुँच

विराटनगर । नेपालको धितोपत्र बजार (सेयर बजार) मा आम नागरिकको सहभागिता उल्लेख्य रूपमा बढेको छ। सरकारले सार्वजनिक गरेको ‘आर्थिक सर्वेक्षण २०८२/८३’ अनुसार मुलुकको कुल जनसङ्ख्याको करिब २६ प्रतिशत हिस्सा अहिले पुँजी बजारको पहुँचमा पुगेको छ।

तथ्याङ्क अनुसार २०८२ फागुन मसान्तसम्म डिम्याट खाता खोल्नेको सङ्ख्या ७६ लाख ३९ हजार पुगेको छ। त्यस्तै, मेरो सेयर प्रयोगकर्ताको सङ्ख्या पनि ६६ लाख १३ हजार नाघेको छ। सर्वेक्षणले सेयर बजारमा प्रविधि र डिजिटल प्रणालीको प्रयोग बढेसँगै सर्वसाधारणको आकर्षण बढेको चित्रण गरेको छ।

आर्थिक क्षेत्रमा पुँजी बजारको भूमिका
पछिल्लो समय धितोपत्र बजारले मुलुकको आर्थिक क्षेत्रमा पुँजी परिचालनको मुख्य स्रोतका रूपमा भूमिका खेलेको छ। सर्वेक्षणका अनुसार चालु आर्थिक वर्षको फागुन मसान्तसम्म प्राथमिक बजार मार्फत कुल ५४ अर्ब १६ करोड रुपैयाँ बराबरको पुँजी परिचालन भएको छ। यो अघिल्लो वर्षको सोही अवधिको तुलनामा ११७ प्रतिशतको विशाल बढोत्तरी हो।

primary market बाट संकलित यो रकम जलविद्युत, बैंकिङ र अन्य उत्पादनमूलक क्षेत्रमा परिचालन हुँदा यसले राष्ट्रिय उत्पादन र रोजगारी सिर्जनामा प्रत्यक्ष योगदान पुर्‍याएको छ। साधारण सेयर, हकप्रद सेयर, म्युचुअल फण्ड र ऋणपत्र (Bond) मार्फत भएको यो पुँजी परिचालनले छरिएर रहेको स-सानो बचतलाई एकीकृत गरी ठूला विकास परियोजनामा लगानी गर्ने वातावरण तयार पारेको छ।

२०८२ फागुन मसान्तमा नेप्से सूचक २८२०.४५ विन्दुमा कायम भएको छ भने कुल बजार पुँजीकरण ४७ खर्ब ४४ अर्ब रुपैयाँ पुगेको छ। बजारमा सूचीकृत कम्पनीहरूको सङ्ख्या २८६ पुग्नुले निजी क्षेत्रको पुँजी सङ्कलनमा धितोपत्र बजारको निर्भरता र विश्वास बढ्दै गएको पुष्टि हुन्छ।

डिजिटल भुक्तानी र अनलाइन कारोबारको सहजताले गर्दा गाउँ-गाउँमा रहेका लगानीकर्ताहरू समेत आर्थिक प्रणालीको मूलधारमा जोडिन सफल भएका छन्, जसले दीर्घकालीन रूपमा मुलुकको वित्तीय प्रगाढतामा टेवा पुर्‍याएको सर्वेक्षणले देखाएको छ।