विराटनगर । वरिष्ठ अधिवक्ता टीकाराम भट्टराईले पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकको गिरफ्तारीलाई पूर्णतः गैरकानुनी र प्रक्रियागत रूपमा दोषपूर्ण रहेको टिप्पणी गर्नुभएको छ । प्रहरीले कानुनको गलत व्याख्या गर्दै दुई नेतालाई पक्राउ गरेको भन्दै उहाँले भोलि (आइतबार) सर्वोच्च अदालतमा बन्दीप्रत्यक्षीकरण रिट दायर गर्ने घोषणा गर्नुभएको छ ।
विराटनगरमा उपलब्ध समाचार स्रोतका अनुसार, अधिवक्ता भट्टराईले प्रहरीले जारी गरेको ‘जरुरी पक्राउ पुर्जी’ को औचित्यमाथि प्रश्न उठाउनुभएको हो । “प्रहरीले ओली र लेखकलाई जरुरी पक्राउ पुर्जी थमाएर पक्राउ गर्नु नै गैरकानुनी छ,” भट्टराईले भन्नुभयो, “दुई जनालाई पक्राउ गरिएको प्रक्रिया मिलेको छैन र यसरी कानुनी प्रक्रिया नपुर्याई पक्राउ गर्नु आफैँमा गलत र दोषपूर्ण छ ।”
वरिष्ठ अधिवक्ता भट्टराईले कानुनी प्रावधानको व्याख्या गर्दै जरुरी पक्राउ पुर्जीको दुरुपयोग भएको तर्क गर्नुभयो । उहाँका अनुसार जरुरी पक्राउ पुर्जी अभियुक्त भागेर जाने प्रबल सम्भावना भएको वा तत्काल पक्राउ नगरे प्रमाण नष्ट हुने विशेष परिस्थितिमा मात्रै जारी गर्न सकिन्छ । तर, पूर्वप्रधानमन्त्री र पूर्वगृहमन्त्री जस्ता सार्वजनिक व्यक्तिहरूका हकमा यो अवस्था लागू नहुने उहाँको जिकिर छ ।
“उहाँहरू कतै भागेर जाने वा प्रमाण नष्ट गर्ने अवस्था थिएन । त्यसैले जरुरी पक्राउ पुर्जीको प्रयोग यहाँ पूर्णतः गलत मनसायले गरिएको छ,” भट्टराईले थप्नुभयो, “यो पक्राउ प्रक्रियागत रूपमा त्रुटिपूर्ण र दोषपूर्ण छ, जसका विरुद्ध हामी न्याय खोज्न सर्वोच्च जान लागेका हौँ ।”
गत भदौ २३ र २४ गते भएको ‘जेनजी’ आन्दोलनका क्रममा भएको घटनाबारे छानबिन गर्न गठित पूर्वन्यायाधीश गौरीबहादुर कार्की नेतृत्वको आयोगको प्रतिवेदन कार्यान्वयन गर्ने बहानामा प्रहरीले आज बिहान दुवै नेतालाई भक्तपुरबाट नियन्त्रणमा लिएको थियो । यस कदमलाई कानुनी वृत्तमा प्रतिशोधपूर्ण र प्रक्रिया मिचिएको घटनाका रूपमा हेरिएको छ ।
प्रतिक्रिया दिनुहोस्
यस लेखमा प्रतिक्रिया बन्द गरिएको छ।