विराटनगर । राष्ट्रिय स्वतन्त्र पार्टी (रास्वपा) का सभापति रवि लामिछाने आज झापा र सुनसरीको अत्यन्तै व्यस्त राजनीतिक दौडाहामा रहेका छन्। जनसम्पर्क तथा घण्टी अभिवादन कार्यक्रम लिएर लामिछानेले आजै झापाका विभिन्न ६ वटा स्थानमा आयोजना हुने कार्यक्रमहरूलाई भ्याएका छन् ।
बिहानै ८ बजे झापा क्षेत्र नम्बर ३ को चन्द्रगढी (महेन्द्र पार्क दक्षिण क्षेत्र) बाट सुरु भएको उनको अभिवादन यात्राले जिल्लाका मुख्य व्यापारिक केन्द्र र चोकहरूलाई समेटेको छ। उनले बिहान ८ः४५ मा काँकडभिट्टा र इटाभट्टा, ९ बजे धुलाबारी र चारआली, तथा ९ः३५ मा बिर्तामोड, चारपाने र लक्ष्मीपुर क्षेत्रका मतदातासँग प्रत्यक्ष संवाद गरेका छन् ।
त्यसैगरी, बिहान १०ः२० मा सुरुङ्गा, दुधे र झिलझिले हुँदै ११ः१० बजे दमक पुग्ने कार्यक्रम भएपनि केही अबेर भएको छ । अहिले उनी दमकमा आयोजित कार्यक्रममा छन् । झापाका यी आधा दर्जन कार्यक्रमहरूमा लामिछानेलाई स्वागत गर्न स्थानीय समर्थकहरूको उल्लेख्य उपस्थिति देखिएको छ।
झापाका कार्यक्रमहरू सकाएलगत्तै सभापति लामिछाने सुनसरीको इटहरी आउनेछन् । इटहरीमा आयोजना हुने कोशी प्रदेश लक्षित सभामा लामिछानेका साथै पार्टीका बरिष्ठ नेता बालेन्द्र शाहले समेत सम्बोधन गर्ने कार्यक्रम छ ।
रवि लामिछाने र बालेन शाह एउटै मञ्चमा देखिने भएपछि इटहरीको सुरक्षा व्यवस्था र जनसहभागितालाई लिएर स्थानीय प्रशासनले समेत विशेष तयारी गरेको छ। रास्वपाले फागुन २१ गते हुन लागेको प्रतिनिधिसभा निर्वाचन लक्षित कार्यक्रम गरेको हो ।
प्रतिक्रिया दिनुहोस्
यस लेखमा प्रतिक्रिया बन्द गरिएको छ।